Төрскән харсачнрин ач-тусинь темдглҗ

25-02-2025, 11:56 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр мана орн-нутгт Төрскән харсачин Өдр темдглгдв. Элстд иргнә болн Төрскән харсгч Алдр дәәнә баатрмудт нерәдсн бумблвин өөр митинг болв. Хальмг Таңһчин Толһач Хаска Бату, Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән, Төрскән харсгч Алдр дәәнә ветеран Петр Леонтьев, цергә шишлң керг-үүлдврт орлцачнр, зөв-йос харлһна бүрдәцсин һардачнр, олна үүлдәчнр болн баһчуд терүнд орлцв.
Хальмгин Толһач Хаска Бату цуглрсн улсиг сән Өдрлә йөрәв.
– Лу сарин 23-д төрскнч седклтә улсин болн зөргтә баатрмудын өдр гиҗ темдглгднә. Әрәсән Президент Владимир Путинә зәрлгәс иштә 2025 җил Төрскән харсачин җил гиҗ зарлгдв. Тегәд Алдр Диилврин 80 җилин ончта өөнин өмн эн өдрин чинр хойр дам байрта болн темдгтә болҗана. Мана орн-нутгиг немшнрин өшәтнәс сулдхсн дәәнә күндтә ветеранмудт болн эндр цергә шишлң керг-үүлдвр давҗадг һазрт Төрскән харсчадг нег һазра улст ик ханлтан өргҗәнәв. Эднә зөргтә, туурмҗта йовдлмуднь сурһулин тууҗин даслурмудт эрк биш орхмн, – гиҗ Бату Сергеевич темдглв.
Тер мет өдгә цагт СВО-н ветеранмуд дорас өсч йовдг үйнрт төрскнч седклтә сурһмҗ өглһнә төлә ик көдлмш күцәҗәнә. Терүнәс нань удл уга мана таңһчд «Баатрмуд 08» нертә көтлвр экләд күцәгдхмн. Энүнә йовудт цергә шишлң керг-үүлдврин ветеранмудыг белдҗ, таңһчин бүрдәцсәр һарддг эв-арһ өггдхмн.
Тер өдр таңһчин Толһач Хаска Бату Алдр Диилврин 80 җилин өөн угтҗ, дәәнә ветеран Петр Леонтьевд ирлцңгү медаль бәрүлҗ өгв.
Петр Леонтьевич цуглрсн улсиг йөрәҗ, чинртә медаляр ачлгдснь энүнә төлә тууҗлгч йовдл болҗахнь темдгәд ханлтан өргв. Митингд орлцачнр болхла дәәнә ветераныг дөңнәд һурв дәкҗ «УРА!» гиҗ хәәкрәд йөрәв.
Керг-үүлдврин йовудт цергә шишлң керг-үүлдврин ветеран, Элст балһсна Хургин депутат Чумуда Николай бас йөрәлин үгән келв.
– Хальмг Таңһч маднд чидл өгчәдг һазр болҗана. Төрскән харсгч Алдр дәәнә ветеранмудт болн СВО-д орлцачнрт бидн оньган өгч даңгин дөңнх зөвтәвидн. Тер мет эднә үлгүрәр дорас өсч йовдг баһчудыг сурһҗ өскх кергтә, гиҗ Николай Санджи-Горяевич темдглв.
Митингин йовудт «Баатрмудын һазр» гидг чинртә йовдл күцәгдв. Яшкулин района Хулхт селәнә тууҗлгч һазрас шаврин атхм кенчрт орагдад, хөөннь сумнд тәвгдәд Өмн үзгин цергә округин чонҗд йовулгдад тенд хадһлгдхмн.
Керг-үүлдврин чилгчәр цуглрсн әмтн Мөңк һалын өөр цецгүд тәвҗ, Төрскән харсачнрин санлынь тевчв.

КАРСАНА Евгения

Видео