Шар шаҗна хургт белдәд

Шидр Хальмгт шар шаҗна сурһалин болн шинҗллтин саңгин президент Алексей Маслов ирв. Алексей Александрович нертә номт болн сурһмҗлгч, мана орн-нутгт шар шаҗна делгрлтд ик тәвцән орулсн күн болна.
Хальмг Таңһчин Толһач Хаска Батула харһсн йовудт намртан Элстд болх шар шаҗна нарт-делкән III хургин тускар күүндвр болв. Чинртә хургин көтлврт онц оньг тусхагдв. Мана таңһчд ирх номтнрт, шинҗләчнрт, олна үүлдәчнрт, арһлачнрт болн талдан олн-әмтнд ирлцңгү үрвр белдх кергтә. Тер мет Хальмгт шар шаҗн яһҗ делгрҗәхин тускар шишлң фильм цокч авхар зуралгдҗана.
– Олна кергт тәвцән орулҗадг улст ханлтан өргҗәнәв. Бүрдәгдсн оргкомитетд нег һазра билгтә зурачнриг, билгтнриг, ресторатормудыг, хувц уйҗ һарһдг урчнриг болн талдан олн мергҗлтнриг хургин белдврт орлцулхар даалһвр өггдв. Терүнәс нань волонтермудыг орлцулх бас кергтә. Эн туст Б.Б.Городовиковин нертә Хальмг ик сурһуль нөкд болхмн. Ахнр-дүүнр болҗадг Бурять Республикин дамшлтыг учртан авхмн. Бурятяс волонтермудыг бас орлцулхар зуралҗанавидн, мана арвтнрла тедн дамшлтарн хувалцҗ чадхмн. Әрәсән Президентин һардврт, талын орна кергүдин Министерствд, Росконгресст болн шар шаҗна сурһалин болн шинҗллтин саңгин президент Алексей Маслов дик ханлтан күргҗәнәв, – гиҗ Бату Сергеевич товчлв.
ОЛЬДАН Цаһан