Екатеринбургур нисч болхмн

Мөрн сарин 2-ас авн Элстәс Екатеринбург балһсн күртл самолет экләд нисхмн. Урднь Москва болн Сочи балһсд күртл секгдсн рейсмүдлә хамдан ода нег һазра улс Екатеринбург күртл нисч чадхмн.
Екатеринбург Уральск федеральн округин хотл балһсн болна. Әрәсән у-өргн һазрин төвд бәәдг төләдән Бурять болн Тыва Республикүр нисч йовдг зуульчнр мел тенд бууһад, талдан самолетд сууһад күрч чадх. Элстәс Екатеринбург күртл Red Wings авиакомпаня Superjet-100 зун күн багтамҗта өдгә цага самолет нисхмн. Сочи балһснас Элст күртл болхла мөрн сарин 1-әс авн долан хонгт хойр дәкҗ нисч болхмн.
– Эн туст ик көдлмш кегдв, «Новапорт Холдинг» бүрдәцин һардач Евгений Янкилевичд болн Red Wings авиакомпаня һардач Владимир Камынинд ханлтан өргҗәнәв. Цааранднь чигн таңһчд авиазөрүллтин то икдүләд делгрүлхмн. Хаврар бамб цецгин наадмд олн-әмтиг күләҗәнәвидн, – гиҗ Хаска Бату темдглв.
ОЛЬДАН Цаһан