Госпиталин тосхлтыг бүрткв

Таңһчин Толһач Хаска Бату Элстд тосхгдҗадг дәәнә ветеранмудын госпиталиг бүрткҗ хәләв. Эннь ик чинртә бәәрн болҗана. Тер юңгад гихлә тенд дәәнә ветеранмуд эрүл-мендин бәәдлән ясрулҗ, сән чинртә эмнлһ авч чадхмн.
Урдк җилд Хаска Бату Әрәсән Президент Владимир Путинлә харһсн кемд госпиталин тосхлт эклв гиҗ зәңглсн билә. Төрскән харсачин җилд социальн чинртә эн бәәрн тосхгдснь хойр дам темдгтә болхнь лавта.
- Эндр тенд инженерн сурвлҗн орулгдҗана, керглгдҗәдг цуг тосхлтын материалмуд бәәнә. Тер мет кергтә мөңгн йилһгдәд, көдлмш зогсал угаһар цаг-болзгтнь күцәгдҗәнә. Таңһчин залврин ахлачин дарук Александр Мишаковд эрүл-менд харлһна министерствлә болн «Росстройконтроль» бүрдәцлә хамдан тосхлтын йовудыг бүрткх даалһвр өггдв, – гиҗ Бату Сергеевич ашлв.
КАРСАНА Евгения