Мьянман элчнрин йосна гиичллһн

Эн долан хонгин эклцәр Әрәсәд Мьянма Республикин залврин ахлач Мин Аун Хлайн ирв.
Хөрн тавн җил хооран мана орн-нутг эн республиклә нөкцлтин халхар хамцу декларац батлсн билә. 1948 җилд Советин Союз бәәсн цагт мана орн-нутг Мьянма Республикиг дөңнв.
Әрәсән Президент Владимир Путинлә Москвад болсн харһлтын йовудт Мин Аун Хлайн энүг бүләнәр тоссиг үнлҗ ханлтан өргв. Мана орн-нутгт арвн негн дәкҗ ирҗәхмдн тер, гиҗ гиич темдглв.
– Дипломатическ хәрлцәг цаарандан делгрүлхин төлә Әрәсәд Мьянма Республикин элчллтин хойр әңг секхәр бәәнәвидн. Тер мет орн-нутгтан Мандалай балһснд Әрәсән элчллтиг секхәр зуралҗанавидн, – гиҗ Мин Аун Хлайн келв.
Мьянман элчнрин йосна гиичллһнә йовудт хойр орн-нутгин хоорнд чинртә бооцас батлгдв.
Тодлхас, 2024 җилин чилгчәр Хальмг Таңһчин Толһач Хаска Бату Мьянма Республикд одсн билә (зургт). Тиигхд мана республикүдин хоорнд сойлын, номин, спортын, зуульчллһна, селәнә эдл-ахун болн талдан халхар чинртә бооцас батлгдсн болдг. Онц темдглхд, намртан таңһчд болх шар шаҗна нарт-делкән III хургт Мьянман делегац ирх гиҗ күләгдҗәнә.
– Хальмг Таңһч болн Мьянма нег-негнәсн хол бәәдг болв чигн авг-бәрцәрн өөрхн республикүд болҗасан темдглвидн. Мана келн-улс нег шаҗнд шүтдг, нег үлү йоста дәәчнр авцта улс болдгинь бас медвидн. Һаха сард болх нарт-делкән хургт эн орн-нутгин элчнриг күләҗәнәвидн, – гиҗ Бату Сергеевич товчлв.
ОЛЬДАН Цаһан