Непалын элчлә күүндв

Шидр таңһчин Толһач Хаска Бату Әрәсәд Непал орн-нутгин элч Джанг Бахадур Чауханла харһв. Шар шаҗна зуульчллһна, хулд-гүүлгәнә-экономикин, сойлын болн номин халхсар нөкцлтхин туст күүндвр болв. Тер мет Непалд орс кел даслһна эв-арһ бас хәләгдв.

Непалд шар шаҗна гүн номин хург давулхар зуралгдҗана. Тенд нег һазра мана номтнриг орлцулхин туст үрвр кегдв.
– Б.Б.Городовиковин нертә Хальмг ик сурһульд шар шаҗна төрәр лекц умшхин төлә Джанг Бахадур Чауханд үрвр кегдв. Терүнә йовудт мана оютнрт эврәннь орн-нутгиннь тускар тодрхаһар келҗ өгч чадхмн. Хальмг Таңһч Европд шар шаҗна өвәрц төв болсн төләдән шар шаҗнд шүтдг талдан орн-нутгудла нөкцлтин болн хоорндк залһлдана туст ик нилчән күргхнь лавта. Непалын күндтә элчд һаха сард болх шар шаҗна нарт-делкән хургт ирҗ орлцхин туст үрвр кегдв, – гиҗ Бату Сергеевич темдглв.

ОЛЬДАН Цаһан