Өрк-бүлин чинринь өөдлүлхин төлә

Шидр мана таңһчур Әрәсән Президентин медлд бичкдүдин зөв харсдг элч Мария Львова-Белова көдлмшәр ирв. Хальмг Таңһчин Толһач Хаска Бату күндтә гиичлә харһад күүндснә хөөн өнчн бичкдүдин төрәр өргн сүүр болв. Хальмг Таңһчин Улсин Хуралын (Парламентин) Ахлач Артем Михайлов, Хальмг Таңһчин залврин Ахлач Босхмҗин Гилән, энүнә даруксин үүл дааҗадг Өлзәтин Марина болн Алексей Этеев, таңһчин Толһачин һардврин ахлач Кирилл Попов, райодын толһачнр эн селвлцәнд орлцв.
Әрәсән Президент Владимир Путинә даалһврар мана орн-нутгт эк-эцкиннь хәләвр уга үлдсн бичкдүд бәәдг бүрдәцсиг бүртклһнә керг-үүлдвр эклсмн. Давсн җилин бар сард мана таңһчд шинҗләчнрин баг ирәд, социальн бүрдәцсин үүлдвриг шинҗлв, өнчн бичкдүдин иткл цаасд хәләв, җирһлин күнд таалд туссн эк-эцкнрлә харһҗ күүндсн билә. Эн бүртклһнә көдлмшин аш диглҗ, таңһчд өнчн болн эк-эцкин тетквр уга үлдсн бичкдүдин то баһруллһна туст сүв-селвг өггдсмн.
Мария Львова-Белован темдглсәр, мана таңһчд эк-эцкин хәләвр уга үлдсн бичкдүдин то баһруллһна, күнд бәәдлд туссн өрк-бүлмүдт дөң күрглһнә туст сән дамшлт хоршагдсн болв. «Өнчн бичкдүдин герт болн хорһдлд цөөкн бичкдүд бәәнә, өнчн бичкдүд нурһлҗдан көвүчлҗ авсн өрк-бүлмүдт асргдна. Болв нег чигн өнчн бичкн шаңһа бүрдәцд бәәдг болхла, бидн эн бәәдлиг ясрулх зөвтәвидн. Әрәсән Президентин даалһврар бидн җирһлин күнд бәәдлд туссн өрк-бүлд дөң күргҗ, үрдән асрхин төлә цуг таал тогтах зөвтәвидн. Мана шинҗләчнрин баг тана таңһчин социальн бүрдәцсиг бүрткв, күнд бәәдлд туссн өрк-бүлмүдлә күүндв. Тана таңһчд кергән сәәнәр меддг, цаһан седклтә улс көдлҗәнә, өнчн болн эк-эцкиннь хәләвр уга үлдсн бичкдүд бәәдг бүрдәцст сән таал тогтагдҗ. Бату Сергеевичлә хамдан, кесг чинртә төрәр болсн күүндврин ашнь сән болв. Хальмг Таңһчд цугнь улм сән-сәәхн болхд ицҗәнәв», - гиҗ Мария Алексеевна келв.
Хальмг Таңһчин Толһач Хаска Бату күндтә гиичд ханлтан өргәд, намртан Элстд болх шар-шаҗна ик хургт орлцх үрвр кев. Мария Львова-Белован темдглсәр, нарт-делкән ик хург давуллһиг Әрәсән Президент Владимир Путин дөңнсмн, тегәд энтн ик чинртә керг-үүлдвр болхмн, терүнә медлд бичкдүдин зөв харслһна төрәр селвлцә бүрдәлһнә төрәр Бату Сергеевичлә күүндсән заав.
- Мана таңһчд өрк-бүлин авъясмудыг хадһлҗ, үйәс үйд күргнә. Өрк-бүлин чинр хадһллһн мана тууҗин болн сойлын ул тогтана. Олн зүсн йовдл учрдг болв чигн бидн эн төрт ик оньг тусхаҗ үүлднәвидн, юңгад гихлә энтн мана улсин бат ул болна. Сүл цагт мана таңһчд олн үртә өрк-бүлмүдин то өсәд йовна. Бидн өрк-бүлмүдиг дөңнлһнә, нилхд төрлһиг урмдуллһна керг-үүлдврмүдиг цааранднь күцәхвидн. Әрәсән Президент Владимир Путинә темдглсәр, өрк-бүл болһна төлә бәәтхә, орн-нутг болһна төлә үрнәс үнтәнь уга. Энтн мана көдлмшин һоллгч зөрүллт болна. Мария Алексеевна мана таңһчур ирснд болн бичкдүдин зөв харслһна керг-төрт дөң-нөкд болдг төләднь байрлҗ ик ханлтан өргҗәнәв. Бичкдүдин болн өрк-бүлмүдин зөв харслһна, эднә социальн теткврин халхар көдлдг улст бас ханлтан өргҗәнәв, - гиҗ Бату Сергеевич ашлв.
ДООҖАН Наталья