Хальмг Таңһчин нер туурулсн дииләч

20-03-2025, 11:08 | Общество, Спорт, Таңһчин зәңгс, Хальмг Тањєчин Толєачин ґдр-бўр, Зіњг

Шидр Екатеринбург балһснд RCC Boxing Promotions боксар нарт-делкән марһан болв. Терүнд нер һарсн мана спортсмен Натра Чиңһс диилвр бәрәд Eurasian Boxing Parliament чемпиона бүс гертән авч ирв.

Хальмг Таңһчин Толһач Хаска Бату, спортын министерствин, таңһчин спортын олн клубин, баһчудын бүрдәцсин элчнр болн артистнр Элстин аэропортд Натра Чиңһсиг тосв.
Нертә дууч Брүгидикә Айса хальмг ут ду дуулад,Чиңһст цаһан хадг татв. «Джунгария» бичкдүдин ансамблин артистнр дииләчд хальмг бииһән нерәдв. Натра Чиңһс биичнриг дахад бас биилв.
Екатеринбургд болсн марһанд Чиңһс дамшлтта спортсмен Эрди Катомпала дөрлдв. Зөвәр чинвртә болсн дөрлдәнд Чиңһс аштнь диилв.
Ода деерән һучн хойрта Натра Чиңһсиг диилсн спортсмен уга.
– Намаг Элстд тедү мет бүләнәр тосх гиҗ нам санҗасн угав. Тюмень, Челябинск балһсдт бәәдг нег һазра улс Екатеринбургд болсн марһанд ирәд, намаг дөңнснднь ханлтта бәәнәв. Амр биш дөрлдән болв, Эрди Катомпа ик дамшлтта спортсмен, марһана өмн дамшачнртаһан хамдан энүнә эв-довиг гүүнәр шинҗләд белдвидн. Дорас өсч йовдг бичкдүд спортар соньмсад, цогц-махмудан батрулх зөвтә, гиҗ санҗанав. Арвн күүнәс негнь ончрад, эрк биш төрскн һазрин нер дуудулхнь лавта болхмн, – гиҗ Чиңһс ухан-тоолврарн хувалцҗ келв.
Хальмгин Толһач Хаска Батун үгәр, спортд даңгин мел өмәрән зүткх кергтә болна. Чиңһсин диилвр дорас өсч йовдг баһчудт эрк биш урмд өгх зөвтә гив.
Натра Чиңһсин болн Эрди Катомпан дөрлдәг Хаска Бату «Дәәч» төвин дамшачнрла хамдан телеүзләр хәләсн билә.
Марһана ашар Чиңһс диилвр бәрәд, энүг ачллһна керг-үүлдврт мана көвүн улан залата махла өмсәд хальмг дууна айс күңкнснь басл бахмҗта болв. Энүг дөңнхәр ирсн нег һазра улс «Уралан!» гиҗ хәәкрәд альхан ташад бәәв.
Натра Чиңһсин намтрт эннь нәәмдгч диилврнь болв. Эн диилврән Чиңһс Хальмгин хәәртә үрн, Европин, нарт-делкән болн БРИКС нааддын чемпион, моһа сарин 11-д сәәһән хәәсн Карун Санҗд нерәдсн болдг.
КАРСАНА Евгения

Видео