Шаҗна ик хургин төрәр күүндв

Эн җил намртан Элстд болх бурхн-шаҗна нарт-делкән III ик хург болхмн. Ик чинртә керг-үүлдврт белдвр келһнә медлд Хальмг Таңһчин залврин Ахлачин негдгч дарукин үүл дааҗадг Цернә Эрднь Москвад кесг харһлт давулв.

Шидр Хальмгин делегац Әрәсән Орн-нутгин Хүүвин зуульчллһна болн зуульчллһна таал делгрүллһнә комитетин ахлач Тарбан Саңһҗла харһв. Таңһчд зуульчллһна бүрдәцс гиичнриг тосхлһнд белдвр келһнә төр харһлтд босхгдв. Ода мана таңһчд зуульчллһна бүрдәцсин то-диг бүртклһнә көдлмш күцәгдҗәнә, бурхн-шаҗна тосхлтсин эргндк һазрт сән кец-таал тогтагдҗана, гиҗ Эрднь Николаевич зәңглв.
Әрәсән Орн-нутгин Хүүвин эрүл-менд харлһна комитетин ахлачин негдгч дарук Башанкан Бадмла, Әрәсән сойлын, финансин, сурһуль-эрдмин, то-дигин делгрлтин министерствст болн Әрәсән Президентин һардврт болсн харһлтст ик хургин көтлврин тускар күүндвр болв. Ик хургин медлд олн зүсн төрәр харһлтс, «төгрг ширән» сүүр, хургуд болхмн.Тиигәд бурхн-шаҗна медицинә болн бурхн-шаҗнд шүтдг орн-нутгудт зуульчллһ делгрүллһнә төрмүдт нерәдгдсн сүүр болхмн гиҗ зуралгдҗана.
Хальмг Таңһчин элчллтд болсн харһлтд «Әрәсән бурхн-шаҗна сүзгтнрин төв заллтын төв» шаҗна бүрдәцин ахлач Йонтен Лодой гевш, энүнә дарук, Москван бурхн-шаҗна сүзгтнрин ниицәнә хүүвин толһачин дарук Җимбин Константин орлцв. Эдн ик хургт ирх ламнриг гиичлүрт бәәлһнә, хотар тетклһнә болн нань чигн бүрдәмҗин төрмүд хаһлсн цагт бурхн-шаҗна некврмүдиг учртан авлһна туст сүв-селвг орулв.
БАТАН Сәәхлә