Күцәмҗтәһәр көдлҗәдг улсиг ачлв

Шидр Элстд таңһчин ЖКХ-н көдләчнрин сән Өдрт нерәдсн байрин хург болв. Хальмг Таңһчин Толһач Хаска Бату, Улсин Хуралын (Парламентин) Ахлач Артем Михайлов, залврин Ахлач Босхмҗин Гилән, министерствсин, ведомствсин элчнр болн олна үүлдәчнр керг-үүлдврт орлцв.

Таңһчин Толһач Хаска Бату ЖКХ-н көдләчнрин чинринь өөдлүлҗ, йөрәлин үгән эклв.
– Мана таңһчин иргнмүдт сән таал тогтахин төлә өдр-сө уга кергән күцәҗ йовнат. Мел тана нилчәр мана гермүдт дулан, сарул-сәәхн болна. ЖКХ-н халхин ветеранмудт онц ханлтан өргҗәнәв. Эндр көдлҗәдг үүрмүдтн тана үлгүрәр кергән цааранднь даавртаһар күцәҗәнә, – гиҗ Бату Сергеевич темдглв.
– Хальмг Таңһчин залврин болн эврәннь нерн деерәс ЖКХ-н көдләчнриг әрүн седкләсн йөрәҗәнәв. Тана кех-күцәҗәх көдлмштн ил үзгдҗәнә. Кергән үнн-чик кевәр күцәсн төләд нег һазра мана улс сән кец-таалта гермүдт бәәнә, – гиҗ Босхмҗин Гилән келв.
Энүнә темдглсәр, Элстд бәәтхә таңһчин райодт бас сән таал тогтагдҗана. Тиим кевәр шаңһа төсвсин йовудт Лагань балһснд «Көк теңгсин айс» нертә парк, Городовиковск балһснд «Башантан яарм» тосхгсинь тодлулв.
Сүл җилмүдт шаңһа төсвсин болн таңһчин делгрлтин шишлң көтлвр күцәлһнә йовудт ЖКХ-н халхар кесг төрмүд хаһлгдҗана, гиҗ келх кергтә. Олн-әмтиг үүмүлҗәдг усна нәрн төр хаһлгдад, «Деед Яшкуль-Элст» болн негдгч тойгта усна сурвлҗна ясвр төгсхдән өөрдҗ йовна. Тер мет эн җил Иҗл һолас татгдх усна сурвлҗна тосхлтын ирлцңгү бәрмт цаасн белдгдхмн. Терүнәс нань сүл тавн җилин эргцд шаңһа төсвс күцәлһнә йовудт таңһчд олна 59 болн 34 гермүдин өөр сән таал тогтагдв. Өдгә цагт эн көдлмш цаарандан күцәгдҗәнә. 2028 җил күртл нурҗадг 47 гермүдәс 2700 күн нүүлһгдхмн гиҗ зуралгдҗана.
Одахн Элст балһсна эдлврин төлә хог-бог ачҗ зөөҗ һарһдг «РАРЗ» тамһта зурһан машин лизингин эв-арһар хулдҗ авгдв. Шин машидлә хамднь хог-бог цуглулдг 330 шишлң сав бас хулдҗ авгдсинь заахмн.
Терүнәс нань мана таңһчин ЖКХ-н көдләчнр Луганск Улсин Республикин Антрацитовск районд бас дөң-тусан күргҗәнә. Сүл хойр җилин туршарт баһ биш кемҗәтә көдлмш күцәгдв. Олн патьрта тавн герин ора сольгдв, сурһуль-эрдмин 14 бүрдәцд шишлң кергсл углҗ тәвгдв, сойлын хойр гер ясгдв, ут тоодан 24 бәәрнд ирлцңгү көдлмш күцәгдв.
Байрин хургин йовудт сәәнәр көдлҗәдг улс олн ачлврмудар темдглгдв. Цуглрсн әмтнд ЖКХ-н көдләчнрин күцәмҗин туск фильм үзүлгдв. Хальмгин нертә артистнр болхла билг-эрдмәрн олыг байрлулв.
КАРСАНА Евгения