Росгвардейцнриг йөрәв

Шидр Әрәсән Росгвардин көдләчнр сән Өдрән темдглв. Таңһчин Росгвардин заллтд болсн байрин хургт Хальмгин Толһач Хаска Бату, залврин Ахлач Босхмҗин Гилән, ведомствин ветеранмуд болн офицермүд орлцв.

Таңһчин Росгвардин заллтын һардач, полицин полковник Настинә Нарн керг-үүлдвриг секч, эндр кех-күцәҗәдг көдлмшин тускар цәәлһҗ келәд, цуглрсн улсиг йөрәв.
– Росгвардин цергчнр зөв-йос харлһна талдан бүрдәцсин көдләчнрлә хамдан таңһчд әәмшг уга бәәдл тогталһнд тәвцән орулҗана. Тер мет цергә шишлң керг-үүлдвр давҗадг һазрт бас зөргтәһәр кергән күцәҗәнә. Таңһчин һардврла өөрхн нөкцлтҗ, олна керг хаһллһнд орлцна. Ведомствин һардач, полицин полковник Настинә Нарнд, ветеранмудт болн эндр көдлҗәдг улст ханлтан өргҗәнәв, – гиҗ Хаска Бату йөрәв.
Тер мет таңһчин залврин Ахлач Босхмҗин Гилән олна йөрәлин үгд бас багтв. Терүнәс нань цергә шишлң керг-үүлдврин йовудт ончрсн таңһчин Росгвардин шишлң әңгүдт церглҗәдг хойр күн «Олна диг-дарана харлһнд» тәвцән орулсн төләдән медальмүдәр ачлгдв. Кесг цергчнр офицермүдин дарани цолан зүүв. Эдн таңһчин һардврин болн залврин Ханлтын бичгүдәр болн үнтә белгүдәр темдглгдв.
Хургин чилгчәр ведомствин көдләчнр болн «Дәәч» төвин арвтнр белдсн концерт үзүлв.