Кунделинг Ринпоче Хальмгт ирв

12-04-2025, 13:30 | Таңһчин зәңгс » Бурхн-шаҗна төрәр

Бурхн Багшин Алтн сүмин гелңгүдин үрврәр Хальмг Таңһчд Кунделинг Тацак XIII Ринпоче ирв. Урднь чигн таңһчд ирҗәсн күндтә багш дәкнәс залрҗ ирснь ик евәлтә йовдл болҗана.

Хальмгт залрҗ ирсн Ринпоче хотл балһснд болн райодар йовҗ шаҗна йосрхл күцәхмн. Шаҗнд шүтдг әмтнлә харһлт кеһәд, шаҗна номин һол ул-сүүрин цәәлһвр өгхмн. Ик цолта күндтә багшин номд орх хөв әмтнд учрҗана.
Эндр, мөрн сарин 12-т, Бурхн Багшин Алтн сүмд Кунделинг Ринпоче Манзшрин гегәнд зальврдг әмтнд номин цәәлһвр өгхмн. Тер өдрин бийднь 16 часла арвн хойр хүвәс тогтдг бурхн-шаҗна номин учр-утхла олн улсиг таньлдулхмн.
Мөрн сарин 13-д 9 часла өрүн күндтә Багшин һардврт ут нас наслхд туслх мөргүл кегдхмн. Цаһан Дәркд зальврҗ, әмтн эн йосрхлд орлцҗ чадҗана.
Мөрн сарин 14-д Кунделинг Ринпоче Көтчнр орхмн. Тенд ут нас насллһнд туслх шаҗна йосрхл күцәгдхмн. Бурхн-шаҗна номин һол ул-сүүрин цәәлһвр күндтә Багш өгхмн. Асхн шидр Элстүр ирәд, Ринпоче цааранднь лекцән умшхмн.
Мөрн сарин 16-д Кунделинг Ринпоче Лаганя районд одхмн. Дондук-Даши хан чиндрлгдснә ормд «Сангсоль» гидг шаҗна йосрхл күцәгдхмн. Дарунь Ринпоче бурхн-шаҗна номин һол учр-утхин цәәлһвр өгхмн.
Мөрн сарин 17-д Кунделинг Ринпочег Яшкульд тосч авхмн. Энд Цаһан Дәркин мөргүлин дөңгәр ут нас насллһна йосрхл күцәгдхмн.
Тер өдрәр асхн шидр Элстд ирҗ, Кунделинг Ринпоче Бурхн Багшин Алтн сүмд лекцән цааранднь умшхмн.
Хальмгт ирсн кемдән шаҗна олн керг-үүлдвр күцәҗ, шаҗнд шүтдг әмтнд гүн номин цәәлһвр өгхмн. Шаҗна туск медрлән гүүдүлх, күндтә Багшин евәлд күртх таал цуг маднд учрҗана.

УШКАНА Сувсн

Видео