Әрәсән Федерацин Хүүвин Ахлачин дарук Инна Святенко: «Хальмг Таңһчд делгрлтин төлә цуг таал бәәнә»

Вчера, 15:01 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр мана таңһчур Әрәсән Федерацин Хүүвин Ахлачин дарук Инна Святенко көдлмшин халхар ирв. Элстин аэропортд күндтә гиичиг Хальмг Таңһчин Толһач Хаска Бату, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән, Әрәсән Федерацин Хүүвин элч Хачира Борис тосч авв. Нидн Москва балһснд «Әрәсә» нарт-делкән ик хургт Инна Святенко Әрәсән эрүл-менд харлһна министр Михаил Мурашкола хамдан мана таңһчин һәәхүл ирҗ хәләсн билә. Тенд Хальмг Таңһчин Толһач Хаска Бату мана тал гиичд ирх үрвр кесмн, тегәд Инна Юрьевна хаврин сән кемд таңһчур ирхәр шиидв. Күндтә гиичлә хамдан Әрәсән Федерацин Хүүвин элч, нертә шатрч Сергей Карякин бас ирв.
Аэропортас гиичнр «Ойрат-Арена» спортын бүрдәцд одв, тенд эдн Алдр Диилврин 80 җилин өөнд нерәдгдсн «Хаврин тег» шатрин марһа секлһнә байрин керг-үүлдврт орлцв. Хальмг Таңһчин Толһач Хаска Бату, Әрәсән Федерацин Хүүвин Ахлачин дарук Инна Святенко болн Әрәсән Федерацин Хүүвин элч, нертә шатрч Сергей Карякин марһанд орлцачнриг йөрәһәд, наадд соньн болн үзмҗтә болхиг дурдв. Марһанд уйн наста болн дамшлтта шатрчнрла хамдан цергә шишлң керг-үүлдврин ветеранмуд орлцҗахнь темдгтә гиҗ Бату Сергеевич келв.
- Хальмг Таңһч Әрәсәд түрүн болҗ шатриг өөдән кемҗәнд өргҗ, сурһульмудт шатрин кичәл орулсмн. Тадн цааранднь эн кергиг өргҗүлҗ үзмҗтәһәр делгрүлҗәхнь бахмҗ үүдәнә. Шатр наадсн улс керсү ухата, билгтә болна. Эндрк марһанд орлцачнрт ик күцәмҗ дурдҗанав, гиҗ Инна Святенко йөрәҗ темдглв.
Марһанд ут тоодан 100 һар күн орлцв. Талдан регионмудас шатрчнр ирснь чинртә болв. Тедн дунд уйн наста шатрч Левгән Өлзәт билә, күндтә гиичнр күүкнлә күүндәд, кедү частан өдрт шатр нааддгар соньмсв (зургт). Хальмг Таңһчин залврин Ахлачин дарук-таңһчин то-дигин делгрлтин министр болн таңһчин шатрин федерацин ахлач Этән Алексей Өлзәтин тускар буульмҗта үг келҗ, иргчдән эн эрк биш ик күцәмҗ бәрҗ нер һарх гиҗ магтв. Күндтә гиичнр СВО-н ветеранмудла бас күүндәд, марһанд күцәмҗ бәрхиг дурдв.
Тер өдрин бийднь Әрәсән Федерацин Хүүвин Ахлачин дарук Инна Святенко, Әрәсән Федерацин Хүүвин элчнр Борис Хачиров болн Байир Путеев, Әрәсән Орн-нутгин Хүүвин депутат Башанкан Бадм балһсна поликлиникд болн П.Жемчуевин нертә таңһчин эмнлһнд одад, бүрдәцсин үүлдврлә таньлдв. Балһсна поликлиникд ирсн кемд дигтә Төрскән харсгч Алдр дәәнә ветеран Петр Леонтьевич Леонтьев эмчәс һарч йовад, гиичнрлә харһв. Хальмг Таңһчин залврин Ахлач Босхмҗин Гилән ветераниг күндтә гиичлә таньлдулад, Петр Леонтьевич 100 насндан күрч йовдг бийнь заглюн, олна бәәдл-җирһлд шунмһаһар орлцна, удл уга Москва балһснд Алдр Диилврин өөнин керг-үүлдврт орлцхмн гив. Әрәсән Федерацин Хүүвд одх санан бәәнә гиҗ Петр Леонтьевич келхлә, Инна Юрьевна энүнә седвәриг дөңнәд, дәкәд нег харһх болҗ үгцв. Таңһчин эрүл-менд харлһна министрин үүл дааҗадг Булат Сараев болн балһсна поликлиникин ах эмч Нәәмнә Бембә бүрдәцин үүлдврин тускар келҗ өгв (зургт). Поликлиник бәәршлҗәдг гер 1937 җилд тосхгдсмн, тегәд региональн эрүл-менд харлһна Хүүвин ахлач Инна Святенко өдгә цага модульн поликлиник тосхлһна седвәр татв. Зәрм регионмудт тиим эв-арһар дарунь эмнлһс тосхгдҗ эдлврт орулгдсн бәәнә, тегәд эн төриг хаһлх кергтә гиҗ эн темдглв. Дарунь цуһар таңһчин эмнлһнд одв, тенд гиич реабилитацин әңгд эмнлһ авчадг цергә шишлң керг-үүлдврт орлцсн нег һазра мана улсла күүндв. Эмнлһнә ах эмч Чумпинә Саглр реабилитацин әңгд ямаран кергсл олзлгдҗахиг үзүлв, энд эмчнрлә зерглҗ психолог көдлнә гив.
Асхар таңһчин залврин Герт эрүл-менд харлһна төрәр ик селвлцән болв. «Эндр бидн таңһчин эмнлһст одвидн. Эрүл-менд харлһна делгрлтин төлә хамгин түрүнд эврә кергән сәәнәр меддг улс кергтә. Таднд тиим улс бәәнә. Дәкәд таңһчд кергтә мергҗлтнриг белддг сурһуль-эрдмин бүрдәцс бәәнә, терүг төгсәснә хөөн дор ормдан көдлхин төлә урмдулгч керг-үүлдврмүд күцәгднә. Нидн Әрәсән Федерацин Хүүвин Ахлач Валентина Матвиенкон дөң-тусар таңһчд ФОМС-ин халхар демин мөңгн йилһгдсн билә, тегәд таңһчин эмнлһснә өрнь даңцагдв. Ода эмнлһсин өрн баһрҗана, тегәд шаңһа дөң цаглань өггдснь туста болв. Ода таңһчд эрүл-менд харлһна халхар зуульчллһ делгрүлх кергтә, терүнә төлә бас таал бәәнә. Сүл цагт талдан һазрас әмтн нааран ирҗәхнь байрта. Таңһчд нәрн төрмүд бас бәәнә, болв тадн тедниг күцәмҗтәһәр хаһлхар шунҗ көдлҗәнәт. Таңһчин йиртмҗнь ке-сәәхн, спорт делгрҗәнә, селән һазрт сән кец-таал тогтагдҗана. Әрәсән Федерацин Хүүв селән һазрт көдлдг улсин болн социальн седвәрин төрмүдәр намртан ик хургуд давулхар зуралҗана, терүнд орлцх үрвр кеҗәнәв. Москва балсһна социальн, эрүл-менд харлһна, сурһулин, спортивн бүрдәцст одад, теднә дамшлтла таньлдҗ, эврәннь күцәмҗин тускар цәәлһҗ болхмн», - гиҗ Инна Юрьевна келв.
Хальмг Таңһчин Толһач Хаска Бату күндтә гиичд ханлтан өргҗ, таңһчд шатр шинәс делгрҗәхин, СВО-д орлцачнриг дөңнлһнә керг-үүлдврмүдин, «Баатрмуд 08» төсвиг цергчнр дөңнҗәхин, селән һазрт шин сойлын гермүд, эмнлһс, хаалһс тосхгдҗахин, сурһульмудт бат ясвр кегдҗәхин тускар ахрар келҗ өгв. Бату Сергеевичин темдглсәр, селән орн-нутгин делгрлтин бат ул болҗана, тегәд тенд бәәх улсиг дөңнҗ, сән кец-таал тогтах кергтә гиҗ келәд, муниципальн бүрдәцсин элчнрин ик хург болсна тускар тодрхаһар келснь гиичнриг соньмсулв.

ДООҖАН Наталья

Видео