Хойр үйин дииләчнр

Шидр мана орн-нутгт Төрскән харсгч Алдр дәәнд Диилвр бәрснә 80 җилин өөнд нерәдәд, «Диилврин диктант» гидг керг-үүлдвр болв. Терүнд таңһчин күцәгч йосна, олна бүрдәцсин элчнр, оютнр болн сурһульчнр орлцв.

Төрскән харсгч Алдр дәәнә, 99 наста ветеран Петр Леонтьевич Леонтьев бас эн керг-үүлдврт орлцснь темдгтә хойр. Тенд ветеран цергә шишлң керг-үүлдврт орлцсн Элмаддин Заловла харһв. Хойр үйин ветеранмуд нег-негән байртаһар тосад, өөрдҗ йовх Алдр Диилврин өөнлә йөрәв. «Тер аврлт уга дәәнд диилвр бәрснд би Танд ик ханлтан өргҗәнәв. Зу нас наслтн, эрүл-менд бәәтн!» - гиҗ СВО-н ветеран Петр Леонтьевичд дурдв.
- «Диилврин диктант» - энтн мана баатрмудын санл тевчлһнә, мана орн-нутгин тууҗ хадһллһна туст бүрдәгдсн чинртә керг-үүлдвр мөн. Өдгә цагт һазадын зәрм орн-нутгуд мана тууҗиг хаҗһрар үнләд, мана аавнрин зөрмгиг муутххар сана зүүҗәнә. Болв бидн тиим йовдлыг бурушах зөвтәвидн. Эндр эн керг-үүлдврт орлцсндан байрта бәәнәв. Хамдан мана орн-нутгин тууҗиг хадһлад, дорас өсч йовх үйнрт үнн-чик сурһмҗ өгий! – гиҗ цергә шишлң керг-үүлдврин ветеран ухан-тоолврарн хувалцв.
Өдгә цагт Элмаддин Залов таңһчин олна бәәдл-җирһлд шунмһаһар орлцҗ, баһчуд дунд төрскнч сурһмҗин төрәр харһлтс давулна. Одахн эн «Хаврин тег» гидг шатрин марһанд цергә шишлң керг-үүлдврин ветеранмудын командын ханьд орлцсн билә. Тер марһанд ут тоодан 100 күн орлцв.
БАТАН Наталья
ЗУРГТ: Төрскән харсгч Алдр дәәнә ветеран Петр Леонтьев СВО-д орлцач
Элмаддин Заловла харһсн кем