Диилврин уласн мод суулһв

Вчера, 11:58 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Аһш балһснд дәәнә цагт әмнәсн хаһцсн дәәчнрин талвңд зун һар җил хооран суулһсн уласн урһҗана. Эн моднд Төрскән харсгч Алдр дәәнә цагт Сталинградск ик бәрлдәнә йовудт харшлт учрсн бийнь 1943 җилд цецгәрәд, мана улсиг диилгдшгон темдг болсмн. Аһшин региональн ботаническ садын номтнр тер алдр уласна модд урһаҗ авад, «Диилврин уласн» гидг керг-үүлдврин йовудт орн-нутгин кесг һазрар терүг тархав. Шидр эн уласна модн мана таңһчд суулһгдв.

Хальмг Таңһчин Толһач Хаска Бату болн Хальмг Таңһчин залврин Ахлачин дарук Җамбинә Очр Элст балһсна Диилврин паркд модыг суулһв. Эн керг-үүлдврт орлцсн таңһчин йиртмҗ харлһна министерствин көдләчнриг Диилврин Өдрлә йөрәһәд, Хаска Бату Сталинградск бәрлдәнд әмнәсн хаһцсн ааван Хаска Данзниг тодлв. «Мана орн-нутгин өрк-бүл болһнд Төрскән харсгч Алдр дәәнд орлцсн ааван, эцкән тодлна. Эдн мана сән-сәәхн иргчин төлә әмән әрвлсн уга. Бидн теднә санл тевчҗ, ханлтан өргҗ теднә нериг өөдән бәрх зөвтәвидн. Эн уласн мана хальмг һазрт иҗлдҗ сәәнәр урһад, зөрмгин темдг болтха», - гиҗ Бату Сергеевич келв.
Таңһчин йиртмҗ харлһна министерствин көдләчнрин күүкд Даниэла Лазарева болн Елена Кравчук бас эн әрүн чинртә кергт орлцв. Б.Б.Городовиковин нертә 18-ч тойгта дунд сурһульд сурдг долата Лена күүкнә келсәр, эн урднь бас модд суулһсн билә. Эднә сурһульд олн үртә өрк-бүлмүд урһа модд суулһсмн, тегәд күүкн терүнд орлцсан келв.
БАТАН Сәәхлә

Видео