Өвкнрин туурмҗинь мөңкрүләд…

Вчера, 12:51 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Эн җилин хамгин чинртә йовдл мана таңһчд өргмҗтәһәр темдглгдв. Хөн сарин 9-д Элстин төвд Алдр Диилврин 80 җилин өөнд нерәдсн керг-үүлдвриг хәләхәр өрүн эртәс авн олн-әмтн цуглрв.
Хальмг Таңһчин һардвр, Төрскән харсгч Алдр дәәнә ветеранмуд, зөв-йос харлһна, баһчудын олна бүрдәцсин элчнр терүнд орлцв. Хальмгин Толһач Хаска Бату нег һазра улсан йөрәһәд, керг-үүлдвриг секв. Энүнә келсәр, Алдр Диилврин 80 җилин өөн цуг әмтнә, орн-нутгин төлә хамгин чинртә йовдл болҗахинь темдгләд, ветеран болһнд ханлтын үгән келв.
– Нарт-делкәд хамгин әәмшгтә, ик һарута дәәнд орлцад, тадн, күндтә ветеранмуд, мана аавнр-ээҗнр дорас өсч йовсн үйнрин сәәхн иргчин төлә әмән әрвллго диилвр делдҗ йовлат. Нег һазра 40 миңһн һар күн дәәнд орлцсн болдг. Теднәснь хөрн һар күн Советин Союзин Баатрин нер зүүсмн. 10000 һар дәәч орденмүдәр болн медальмүдәр ачлгдсн билә. Хальмгин хәәртә үрд Басан Городовиковин нертә орден болн Делгә Эрднин нертә медаль үүдәҗ, таңһчин делгрлтд ик тәвцән орулҗадг улсиг темдглдг болвидн. Тер мет эндр әмд-менд бәәдг ветеранмуд Петр Леонтьевд, Андрей Великородныйд, Ирина Есиновад, Николай Ищенкод болн Николай Скворцовд ик ханлтан өргҗәнәвидн. Терүнәс нань өдгә цагт цергә шишлң керг-үүлдврт даалһвран күцәҗәдг нег һазра улсиг бас йөрәҗәнәвидн, – гиҗ Бату Сергеевич онц темдглв.
Йөрәлин үгән келәд, Хаска Бату «Җаңһрин» дуулврин баатрмудын андһариг олн-әмтнд соңсулҗ хальмгар чееҗәр умшв. «Дәәч» төвин элчнр, юнармейцнр, хазгуд-кадетнр, Б.Б.Городовиковин нертә Хальмг ик сурһулин цергә төвин оютнр ончта өөнин парадыг эклв. Теднә дару Росгвардин, МВД-н, МЧС-ин, УФСИН-ә болн зөв-йос харлһна талдан бүрдәцсин элчнр балһсна төвәс авн Диилврин талвңгур темцв.
Керг-үүлдврт мөртә цергә 110-ч Хальмг онц дивизин дәәчнрин хувцта 80 күн мөр унад, парадт орлцснь ик һәәхмҗ болн байр-бахмҗ үүдәв.
Парад төгсәд, олн-әмтн «Мөңк һалын» өөр цуглрв. Кесгнь өвкнриннь зургуд һартан бәрәд ирв.
Таңһчин Толһач цуглрсн улсиг ончта өөнлә йөрәҗ, эндр СВО-д орлцҗадг цергчнрт дөң-тусан күргхинь дәкнәс тодлулв. Ах үйин улсин нерн деерәс тылд көдлҗ йовсн, «Әәдрхн-Кизләр» төмр хаалһ тосхлһнд орлцсн Мукан Сарң Диилврин Өдрт нерәдсн байриг бүрдәсн таңһчин һардврт ханлтан өргв.
Санлын керг-үүлдврин чилгчәр олн-әмтн «Мөңк һалын» бумблвд гүрмр цецгүд тәвв. Тер өдр нег һазра күндтә ветеран 99-тә Петр Леонтьев Москва балһсна Улан талвңд болсн Алдр Диилврин өөнин керг-үүлдврт орлцв. Петр Леонтьевиг мана таңһчд ик-бичкн уга цуһар меднә. Терүнәс нань Улан талвңд болсн өөнин байрт «Дәәч» төвин дамшач, цергә шишлң керг-үүлдврин ветеран Энән Андриан болн Хальмг ик сурһулин дөрвн оютн: Лиҗин Байр, Шарапа Сергей, Сергей Голубничев болн Җанган Нарн орлцсинь бас темдглх кергтә.
Өвкнрин туурмҗинь мөңкрүләд…
Өвкнрин туурмҗинь мөңкрүләд…
Өвкнрин туурмҗинь мөңкрүләд…
КАРСАНА Евгения

Видео