Дмитрий Чернышенкола харһв

Хальмг Таңһчин Толһач Хаска Бату Әрәсән залврин ахлачин дарук Дмитрий Чернышенкола харһҗ күүндв. Терүнә йовудт номин, сурһуль-эрдмин, зуульчллһна болн спортын төрмүд босхгдв.
– Дмитрий Николаевич Б.Б.Городовиковин нертә Хальмг ик сурһуль «Приоритет-2030» көтлврт орлцҗахинь онц темдглв. Тер мет мана таңһчд зуульчллһ делгрүллһнә халхар бас күүндвидн. 2024 җилд Хальмгт ирсн зуульчнрин то 22 процентд өсв. Терүнә ашар бидн зуульчнр олар ирдг Әрәсән арвн региона тоод орвидн. Намртан болх нарт-делкән шар шаҗна чуулһнд белдлһнә тускар бас күүндвр һарв. Мана таңһчд оньган даңгин тусхаҗ дөңндг Дмитрий Чернышенкод ханлтан өргҗәнәв, – гиҗ Хаска Бату темдглв.