Цергә сән белдврән үзүлв

Хальмг ик сурһульд төрскнч сурһмҗин кергт ик оньган өгнә. Энд цергә төв, волонтермуд цуг дацңгин оютнриг негдүлнә. Одахн цергә төвд сурдг 40 һар оютн хойр баг бүрдәһәд, Диилврин өдрт нерәдсн парадт орлцҗ, цергә сән белдврән үзүлв.

- Эдн бүкл хойр сара хонгт парадт даавртаһар белдҗ, Алдр Диилврин 80 җилин туурмҗта өөниг темдгтәһәр тосв. Төрскән харсгч Алдр дәәнә тууҗиг эдн сәәнәр меднә, түүнә йовудт әмән өгсн саяд баатрин санлыг әрүнәр хадһлҗана, Советин Союзин Баатр, мана ик сурһулиг бүрдәсн генерал-лейтенант Басан Городовиковин үлгүр эднд кезә чигн байр-бахмҗ үүдәҗ, эднә үүлдврт сән түшг болна. Оютнрин цергә белдврт полковник Дмитрий Марков болн майор Абушинә Элвг ик тәвцән орулҗана, – гиҗ хальмг вузин һардач Салан Бадм ханмҗтаһар келв.
«Элстд болсн парадт бидн хойр сардан белдвидн, цергә йовлһна диг-дараг дасч авлавидн. Росгвардин цергчнр, кадетмүд тер кергиг сәәнәр медҗ, ик дамшлт хоршала, мана оютнр болхла хамгин түрүнд цергә инженерин медрл авч, техникин кев-янзиг дасчала. Болв бидн ахр болзгт зергләд йовлһна диг-дараг дасад, талдан цергчнрлә хамдан парадт орлцҗ чадвидн»,- гиҗ цергә төвин һардачин дарук Абушинә Элвг цәәлһв.
Тиим парад Элстд кесгәс нааран болад уга, тегәд терүг белдлһнә халхар хальмг вузин төвин һардач Дмитрий Марков кесг селвг өгв. Хабаровскд, Ростовд тиим парадмуд келһнә туск дамшлтарн хувалцв.
- Бидн Алдр Диилврин тугиг 80 җилин өөнд нерәдсн парадт делскәд йов- видн, тернь маднд ик дааврта болн байрта-бахта керг болв. Түрүн болҗ тиим парадт орлцлавидн, тер йовдл маднд кесгтән мартгдшго йовдл болв. Мана өвкнрин күцәсн баатр кергиг парад тодлулв, – гиҗ йилһән сәәнәр сурдг оютн Четыра Эрднь тоолврарн хувалцв.
«Бидн болхла үүрмүдтәһән Хальмг ик сурһулин туг өргҗ йовлавидн. Тернь маднд бас ик өргмҗтә йовдл болв. Мана эк-эцкнр, мана таньл үзл улс мана цергә дасмҗиг һәәхв, тернь мана көвүдт ик гидгәр таасгдв», – гиҗ Нүктин Батутөмр байрлв.
Хальмг вузин коллектив Алдр Диилврин 80 җилин өөниг өргнәр темдглв. Хальмг ик сурһульд Төрскән харсгч Алдр дәәнд 35 орлцач көдлҗәлә, тер тоод Хальмг багшин шаңһа күрәлңгин түрүн һардач Джал Орлов, Хальмг ик сурһулин түрүн һардач Николай Красавченко, Хальмг Таңһчин түрүн профессор Бадмин Бата, түрүн академик Эрднин Пүрвә эдн зөргтәһәр дәәлдҗ йовла.
Элстәс авн 28-ч Әәрмин дәәчнрт нерәдсн бумблв бәәдг Хулхт селән күртл оютнр машиһәр йовв, эдн «Алдр Диилврин 80 җилин өөнд – 80 керг» гидг олна төсв күцәв, дәәнд орлцсн эврәннь өвкнрин тускар келҗ өгв. Эднәс кесгнь нам талдан регионд одад, Алдр Диилврин 80 җилин өөнд нерәдсн керг-үүлдврт орлцҗ, таңһчин нер дуудулв. Тиим кевәр хальмг оютнр олна кесг керг бүрдәҗ, ончта өөниг өргмҗтәһәр темдглв.
ТҮРВӘН Һуна