Өөдән мергҗлттә эмч

16-05-2025, 12:49 | Общество, Таңһчин зәңгс, Зіњг, Эрўл-менд харлһн

Шидр П.Жемчуевин нертә таңһчин эмнлһнд Хальмг Таңһчин ачта эмч, Әрәсән эрүл-менд харлһна йилһән сән көдләч Нина Опиеваг ончта өөнләнь йөрәв. Нина Ивановна эн эмнлһнд 1987 җиләс авн көдлҗәнә, үүрмүд дунд эн ик күндллһ олҗ, байн дамшлтта болн өөдән мергҗлттә эмч болҗ тоолгдна.
Аһш балһснд медицинск ик сурһуль төгсәһәд, эн Городовиковск района эмнлһнд күч-көлснә хаалһан экләд, тенд дөрвн җилдән көдлсмн. 1984 җиләс авн хойр җилдән Әәдрхнд ординатурт сурад, терүнә хөөн таңһчин эмнлһнд ирҗ көдлв. Ут тоодан 45 җилдән Нина Опиева таңһчин эрүл-менд харлһна халхд үнн-чик седклтәһәр көдлҗәнә, эндр офтальмологическ әңгин һардачин үүл дааҗана. Келхд, Нина Ивановна эн әңг бүрдәһәд, энд көдлх мергҗлтнриг йилһҗ авсмн. Эн әңгин делгрлтд, эмнлһнә халхд шин эв-арһс олзллһнд эн ик тәвцән орулҗ йовна. Ачта эмч баһ наста мергҗлтнрлә байн дамшлтарн хувалцҗ, эднд эмнлһнә керг-үүлдврмүд давуллһнд дөң-тусан күргнә. Энүнә һардврт төлҗәд, сән мергҗлтнр болсн эмчнр таңһчин райодын, Әрәсән талдан регионмудын эмнлһст көдлҗ йовна. Нина Опиева Т.Хахлынован нертә медицинск колледжла бат залһлда бәрҗ, офтальмологин халхар оютнрт медрл зааҗ йовсмн. Таңһчин эмнлһнә эндокринологическ әңгд селвгч болад, нүднә харань муурсн улст лазер олзлҗ месллһ кеҗ олн җилдән үүлдҗәнә. Эндр Нина Ивановна таңһчин эмнлһнд нүднә өвчин, шав авсн болн харань муурсн улст өөдән чинртә месллһ кенә.
Таңһчин эмнлһнә ах эмч Саглр Чумпинова ах үүрән өөнләнь йөрәһәд, бат эрүл-менд болн хөв-кишг дурдв. Хамдан көдлҗәдг үүрмүднь Нина Ивановнан тускар бүлән үгән келҗ, сүв-селвгәрн урмд өгч, дамшлтарн хувалцҗ даңгин дөңгән күргхдән белн бәәдг төләднь ханлтан өргв.

БАТАН Сәәхлә
ЗУРГТ: ачта эмч Нина Опиеваг йөрәҗәх кем

Видео