Шүүвр өглһнә кем эклҗәнә

Хөн сарин 23-д Әрәсән 89 регионд, тер тоод Хальмг Таңһчд болн һазадын 55 орнд ЕГЭ-н шүүвр өглһнә һоллгч кем эклх. ЕГЭ-н болн ОГЭ-н шүүврин цуг ашнь шаңһа зәңгллһнә диг-даранд орулгдх. Шүүвр өгдг бәәрнд сурһуль-эрдмин салврин мергҗлтнр, медицинск көдләчнр болн олна бүрткәчнр үүлдхмн. 2024 җиләс авн төгсәһәчнр дасчасн нег кичәлиг шинәс өгх зөв авв, тиим арһ эднд Әрәсән Президент Владимир Путинә даалһврар өггдв. Эн җил така сарин 3-д болн 4-д шинәс шүүврән өгч болхмн.

Хөн сарин 21-д ОГЭ-н, бас эн сарин 23-д болхла ЕГЭ-н һоллгч кем эклҗәнә. Цуг көтлвриг болн шүүврин даалһвриг хоорнднь зүүцүллһнә туск Әрәсән Президентин заавр күцәгдв», — гиҗ РФ-н гегән-герлин министр Сергей Кравцов келв. ЕГЭ, ОГЭ, ВПР болн бүртклһнә нань чигн көдлмшин ашинь тоод авлһна диг-дараг министерств хөн сарин чилгчәр тогтаһад, терүг мөчн сард регионмудар йовулх.
Сурһульчнриг эсвәр болн физикәр, йиртмҗ шинҗллһнә нань чигн кичәләр соньмсуллһнд ода һол оньг өггдҗәнә, яһад гихлә техникиг сәәнәр меддг инженермүд болн программистнр орн-нутгт болн регионмудт икәр керглгдҗәнә. Тиим көдлмш Хальмг Таңһчин сурһульмудт чигн өргнәр күцәгдҗәнә.
Сүл хонхин керг-үүлдвриг бүрдәлһнә эв-арһин туск сүв-селвг регионмудт бас йовулгдв. Тер мет шүүврин хөөн төгсәһәчнрт нерәдсн асхна керг-үүлдврт алтн болн цаһан мөңгн медальмүд байрин бәәдлд бәрүлҗ өггдх зөвтә гиҗ мергҗлтнр селвгән өгчәнә.
Хальмг Таңһчд чигн ирлцңгү кергиг сән аштаһар давулхин төлә дигтә-дарата көдлмш кегдҗәнә. Эн җил 11-ч класс төгсәҗәдг 1506 сурһульч болн 9-ч классин 3375 төгсәһәч шүүвр өгхмн.
Таңһчин сурһуль-эрдмин министерств 2025 җилин ГИА-д белдлһнә кемҗәнд дотр-дундын, эрүл-менд харлһна министерствслә болн «Ростелеком» ОАО-ла, РМО-н толһачнрла нөкцлтин туск бооца батлсмн.
Шүүвр өглһнә бәәрнд бичкдүдин зөв теткдг таңһчин күцц зөвтә элч бәәхмн, эн ормс кергтә кергсләр теткгдсн бәәнә. ГИА-д белдхин төлә цуг сурһульмудт дамшуллһна кесг керг-үүлдвр күцәгдв. Шүүвриг үнн-чик болн ил кевәр бүрдәлһнд һол оньг өггдҗәнә. Тер кергт региона бүрткәчнр ик нилчән күргх зөвтә. Түүнә төлә шин эв-арһс өргнәр олзлгдх.
- Шүүврин өмн өргнд мана сурһулин багшнр сурһульчнрин төлә дамшуллһна шүүврин кичәл давулв, тиим кевәр арвтнр шүүврт урдаснь белдҗ, сән аштаһар дааврта кергән күцәх зөвтә, - гиҗ Элстин 12-ч тойгта сурһулин һардач Бембин Борис келнә.
Эднә сурһульд 11-ч классиг 28 күн төгсәҗәнә. Тер тоод 2 күн 1-ч девсңгин медаль авхмн гиҗ багшнрнь тоолҗана, сурһулин җилмүдт эдн бат медрл хоршасн арвтнр болҗана. 1 күн хойрдгч девсңгин медаль авх гиҗ сурһулин һардвр бат ицгтә бәәнә. Болв тиим өөдән ачлвр авхин төлә эдн ЕГЭ-н шүүврән чигн сәәнәр өгх зөвтә.
Эднә сурһулин 9-ч классин арвтнр ОГЭ-н түрүн шүүврән англь келәр өгх. 11-ч классин төгсәһәчнр эврә дурар шүүҗ авсн кичәлән химийәр, тууҗар болн утх-зокъялар өгх зөвтә. Элст балһсна талдан сурһульмудт сүл хонхин керг-үүлдвр хөн сарин 24-д болхмн. Цуг шүүврән сәәнәр өгч, эрк биш күслдән күртн, цааранднь таңһчд туста эрдм дастн, гиҗ эн җилин төгсәһәчнриг йөрәҗәнәвидн.

ТҮРВӘН Һуна