Көтчнрәхн Дала Ламин Гегәнлә харһв

Эн җилин һаха сард мана таңһчд шар шаҗна нарт- делкән ик хург болхинь цугтан күләҗәнә. Әрәсән олн һазрас болн һазадын орн- нутгудас ирсн олн гиичнр Элстд цуглрхмн, чинртә кесг керг- үүлдвр бүрдәгдх гиҗ зуралгдҗана. Тегәд эн өдрмүдт мана хотл балһснд белдврин көдлмш күцәгдҗәнә, таңһчд босхгдсн хурлмудын гермүд ясгдҗ, һаза- дотакнь цеврлгдәд, сән таал тогтагдҗана.
Зуг эн ик хургин йовудт Көтчнрт хурл секгдхиг нег үлү чинртәд тоолх кергтә гиҗ сангдна. Одахн болхла көтчнрәхнә җирһлд басл нег ончта йовдл учрсна тускар зәңг һарв. Тиигәд эн района делегац эврә шин хурл секлһиг угтҗ, Дала Ламин Гегәнәс әдс авхар хол хаалһд йовад ирсн болв. Хальмг Таңһчин Улсин Хуралын (Парламентин) һурвн депутат:Кокан Михаил, Цевгә Григорий болн Амикә Лиҗ, шин хурлын Санан гелң, Көтчнрт босхгдсн хурлын бүрдәмҗин комитетин гешүд Амуна Тогтан Бамбша Михаил хойр болн шаҗнд шүтдг улс бас эн делегацин ханьд орв.
Тодлхас, 1992 җилд Дала Ламин Гегән Хальмгт баралхҗ ирсн кемдән Көтчнрт босхгдх хурлын орм зааҗ, әрвслсн билә. Тер цагас нааран кесг җил давв, хәрнь, зуг 2020 җилд хурлын бәәрнд көдлмш эклв. Тегәд ода көтчнрәхнә болн шаҗнд шүтдг таңһчин әмтнә шунмһа орлцлһтаһар, олна дөң- нөкдәр тавн җилин туршарт Хальмгин төвд гилтә ке- сәәхн хурл босхгдсн бәәнә.
Делегацин гешүдин келсәр, Дала Ламин Гегән Көтчнрт хурл секгдҗәхин тускар соңсад, ик гидгәр байрлсн болна. Шар шаҗна улсин оюни Көтлврч, Ик Багш ном умшад, әдс өгәд, шин хурлын тал дунд өөдмд дүңгәх Будда Бурхна көшә белглв. Энүнәс нань Энткг нутгин барин һарһачд барлгдсн 108 ботьта Ганҗурин шаҗна хураңһус болн Ганҗур-Данҗурт цәәлһвр өгчәдг 254 боть бас Көтчнрә хурлд өгүлв. Оюни Багшин аһу ик чинртә, үнтә белгүд таңһчин кеермҗтә гисн хурлын саңгиг байҗулхнь лавта юмн.
Деер келгдсәр, эн җилин намрар шин хурл байрин бәәдлд секгдх гиҗ зуралгдҗана. Шар шаҗна нарт- делкән ик хургт орлцачнрас нань таңһчд ирсн кесг гиичнр бас эн керг- үүлдврт орлцхмн. Шин хурлд бичкдүдин болн бөдүн улсин төлә оюни- гегәрлтин төв көдлмшән эклх гисн күсл бәәнә.
Эн туст үүдсн ухан- тоолвран медүлсн Йонтен гелң иигҗ келснь тодлгдв: «Эн хурл босхх седвәр татад, ирлцңгү төсв күцәлһнә көдлмш бүрткҗ, һол оньгтан авсн Көтчнрә района толһач Һооҗура Санлын ач- тусинь өөдәнәр үнлх кергтә. Эн буйнта керг района цуг улсиг хамцулад, шар шаҗн делгрхин , мана иргч сән- сәәхн болхин төлә иткл үүдәснь маһд уга. Нарт- делкәд зовх, түрх, муудан орх юмн бичә үзгдтхә, әмтә- киитә хамг юмс эн- тер уга, төвкнүн бәәтхә!»
Хол Энткг орн- нутг орсн Хальмг Таңһчин Улсин Хуралын (Парламентин) депутат, Көтчнрт хурл босхлһна бүрдәмҗин комитетин гешүн Кокан Михаилын келсәр, экнәрәс авн эднә хаалһнь секгдәд, зуралсн хамг тоот амрар, харшлт угаһар күцәгдәд бәәсн болна. «Мана делегац яһдг- кегдг болв чигн шар шаҗна улсин Багшла харһҗ, евәлтә көтчнрә һазрт ик хурл босхгдсинь медүлх күслтә йовсн болдг. Дала Ламин Гегән хурлын туск мадн авч ирсн зургуд үзәд, шин тосхлтын ке- сәәхн тоотынь, хурлын хаша дотрк сән таалта бәәдлинь онц темдгләд, бүлән үгмүд келв. Дала Ламла харһҗ, әдс авснь мадна седкл байсаҗ, зөвәр үүмәтә болсинь ода юуһинь келхв…», -гиҗ Михаил Улюмджиевич байрлҗ- бахтсан медүлв.
- Миниһәр болхла, делегацин ханьд йовсн арвн долан күн буйнта, сән йорта керг күцәҗ ирв. Мана өвкнр чигн иткдг бәәсн шар шаҗна заңшал- авъясиг хадһлх күслтәһәр йовсн улсин санань күцв, гиҗ сангдна. Эн туст шин хурлын бүрдәмҗин комитетин гешүд Кокан Михаилд болн Бамбша Михаилд ханлтан медүлхәр седләв. Эдн Дала Ламин бәәшңд одсн кемд Ик Багшла болсн харһлтд мана хурл босхлһна болн секлһнә төрмүдиг тохнятаһар, тодрхаһар цәәлһҗ медүлҗ чадв, »-гиҗ бас хол һазрт күрәд ирсн Көтчнрт босхгдсн шин хурлын бүрдәмҗин комитетин гешүн Амуна Тогтан тоолврарн хувалцҗ келв.
Тегәд Дала Ламин Гегән эврән бийнь шин хурлын орм зааҗ йилһәд, әдс өгсн учрар Көтчнрә хурл шаҗнд шүтдг улс олар ирдг бас нег евәлтә бәәрн болҗ, иргчнь сарул- сәәхн болхд бат иткл үүднә, гиҗ сангдна. Ода намртан бүрдәгдх шар шаҗна нарт- делкән ик хургин темдгтә гисн нег йовдл болх Көтчнрә хурл секлһнә байриг цугтан күләй!
Шагҗин Любовь
Зургт: Көтчнрә делегац Дала Ламин Гегәнлә харһсн кем