Хальмгудын нер дуудулв

Хальмг улсин билг-эрдм болн урн һарин эрдм альд болвчн әмтнә тааслт олҗ, медрлтә улсин болн номтнрин өөдән үнллһ олна. Хальмг Таңһчин билг-эрдмин ачта үүлдәч Татьяна Милованован һардҗадг Театр белдҗ үзүлдг олн нааднд хальмг улсин кезәңк эрдм цуг халхарн орман олҗ, сойлын сәәхн күцәмҗ болҗ үзүлгднә. Өвкнрин зөөрәс үнтәнь уга эн театрин дарани үүлдвр медүлв.

Татьяна Милованован һардҗадг Театр Казахстанд болсн урн һарин эрдмчнрин нарт-делкән байрин ик хуралтд билг-эрдмән үзүлҗ, хальмг келн-улсин хувциг туурулв. «Даламен үндес баба өнер», гидг нертәһәр тер наадм Казахстана Актау балһснд мөчн сарин 28-29-д болсмн. Олн келн-улсин өвәрц хувциг үзүлсн йоста байрин нәр кевтәһәр тер керг-үүлдвр давсмн. Кесг орн-нутгин урн һарин эрдмчнр болн хувциг ухалҗ, кеерүлҗ белддг зурачнр болн тер хувциг олнд сәәхн кевәр үзүлдг артистнр цуглрҗ ирсмн. Келн-улс болһна тууҗин болн өдгә цага хувцн энд цуглрсн әмтнә нүдиг байрлулснь маһд уга.
Эн олн ке-сәәхн болн өвәрц тоотын дунд хальмг келн-улсин хувцн төрүц геедрсн уга. Татьяна Милованован Театрин сәәхләс өвкнрин авъясиг хадһлҗ, терүнә ул деер уйгдсн хальмг хувциг әвртә кевәр үзүлҗ чадв. Эднә үзүлсн хувцн болһн өвәрцәрн, олзлсн эдин ниилврәр, күүнә цогцин эвинь олҗ ишксн хувцна зоклһарн, цагин йовудт геедрлго, әрүнәр хадһлгдҗ үндсни сәәхниг үзүлҗ герлтсн деерән өмсхд йир эвтә болҗахан медүлҗ, цуг улсиг өврүлв. Эн халхин медрлтә болн шишлң эрдмтә улс хальмг хувциг йир өөдән үнлв. Хувцн болһн эврә ончтаһинь, өңг-зүснь дигтә ниилвртә болснь, шаглар болһнь эвтә кевәр уйгдсиг тедн темдглв.
Хальмг улсин хувцн кецү сәәхн болҗахинь үзсн әмтн хальмг эрдмчнрин болн артистнрин билг-эрдмин тускар ирсн һазр болһндан зәңгиг тархав.
Энд учрсн дәкн нег соньн йовдл хальмгин хувцна туск зәңгин Актауһас олн һазрт күргҗ тархав.
Хальмг хувцта күүкнә - театрин артисткин зург «Өдрин хамгин сән зург» гиҗ үнлгдсмн. «The Guardian» гидг британск зөвәр тоомсрта барин һарцд тер зург һарч ирсмн. Ик шууга татсн зургиг түрг зургч Элькин Эскипехливан цокч авсмн. Цуг делкәһәр кегдсн олн зургудас шүүҗ авгдсн зургуд дунд барлгдад, хальмг келн-улсин хувцта хальмг сәәхлән - зург делкән цуг улст темдгтә болв. Ямаран ик күцәмҗ мөн. Өвкнрин үндсни сәәхн зөөр – аавнр-ээҗнрин уйсн ке-сәәхн хувцна авъясмуд эндрк үйнрин күцәмҗиг йоста кевәр теткҗ йовхинь эн йовдл медүлҗәнә.
Улсин уурхан саңгас үнтәнь угаг ухата болн билгтә һардач Татьяна Милованова сән медҗәнә. Тиигәд мергҗлттә болн урн һарта, чадмг болн седвәртә әмтиг өөрән хамцулад, таңһчд туста ик керг күцәҗәнә.
«Хальмг үннә» умшачнрин нерн деерәс Татьяна Миловановаг болн энүнә театриг иим күцәмҗлә йөрәҗәнәвидн.

ХӨӨЧИН Галина