Бурхн Багшин махла Элстд авч ирхмн

Энткгин һазрт һар бичгин эрдм ямаран бәәсинь медҗ авхд Хальмгт даруһас болх һәәхүл медүлхмн. Әрәсән бурхн-шаҗна үүлдәчнрин оюни төв заллтын һардач гевш Йонтен эн өдрмүдт Энткгин һазрт көдлмшин халхар одсн бәәнә. Нарт-делкән шар шаҗна конфедерацин (IBC) һардач Абхиджит Халдерола түрүн харһлтан гевш Йонтен кев.

Әрәсән оюни төв заллтын (ЦДУБ) болн IBC хоорндк нөкцлтин һол төрмүдәр хойр халх күүндвр кев. Элст балһснд һаха сард болх шар шаҗна үүлдәчнрин ик хургт Энткгин делегацин орлцлһна тускар чигн күүндврт келгдв.
Энткгин делегац Хальмгт ирхләрн онц чинртә белг авч ирхәр белдҗәнә. Тернь – Энткгин орн-нутгин Келн-улсин музейәс шишлң әрүн тоот болҗана. Бурхн Багшин гегәнә махлаг авч ирх санаһан һардач медүлв. Хальмг Таңһчин әмтнд ик евәлтә йовдл – Бурхн Багшин махлад мөргҗ, зальврад Ик Багшин әдс авснла әдл ик буйн-кишглә харһн гиҗәнә.
Терүнәс нань ик һәәхүл Элстд үзүлгдхмн. Энткгин сойлын министерствд үүлддг Jnana Bharatam (Знания Индии) бүрдәцин медлд ордг National Mission for Manuscripts (Национальная миссия по рукописям), гидг бүрдәцд болсн харһлтд тиим һәәхүл бүрдәх санаһан Энткгин халх медүлв. «Чернила, ладонь и пергамент: рукописная культура Индии» гиҗ нерәдгдх һәәхүл һар бичгин эрдм Энткгт ямаран делгрт авсинь үзүлхмн.
Эн бүрдәцин һардач Анирбан Дашла кесн күүндвртән гевш Йонтен Элстд болх хургин тускар келҗ өгв. Цуглрана йовудт Энткгин халхас деер заагдсн һәәхүл үзүлгдхин тускар келгдв. Ода эн күүндврлә кегдсн зөвшәләр Хальмг Таңһчин сойлын министерствлә шишлң зура белдгдҗәнә. Һәәхүл йир соньн болхмн. Келхәс, пальмин хамтхасд деер кегдсн һар бичгин олн факсимиле авч ирҗ үзүлгдхмн. Әмтнә урн һарар кегдсн цаасн деер бичгдсн һар бичгүд чигн олна оньгт тусхагдхмн. Бурхн-шаҗна төрәр бичгдсн тоот, тер тоод олн судрмуд, номин болн эсвин төрәр бичгдсн һар бичгүдлә таньлдна гисн йир соньн болх. Тиигчкәд санскрит, тамильск, персидск, пали келәр бичгдсн һар бичмр олн болх.
Үг һарсн йовудт дәкн нег йовдлыг тодлулхмн. Цөн җил хооран ода гевш Йонтен одсн бүрдәц Әрәсән болн Моңһлын хамгин ик хурлмудт белг өгүлсн билә. Бурхн Багшин номин 108 ботиг эдн барлҗ һарһла. Бурхн Багшин номин күцц хураңһу - «Кангюр» тиигҗ орчулгдҗ барлгдсмн.
Эннь ик чинртә керг болсмн. Бурхн Багшин номиг орчуллһар болн цәәлһвриг белдлһәр цааранднь көдлмш кегдҗәнә. Элстд болх хургин йовудт номин цәәлһвртә кесг хураңһу Хальмгин хурлмудт белглгдхмн.

УШКАНА Сувсн