Селәнә лавкд эд-тавр дала

Үстин района Харба селәнд өсәд-боссн Манҗин Зинаида эрүл-менд харлһна халхар хөрн тавн җилдән көдләд, гемин уршгар ачта амрлһнд һарсмн. 1976 җилд медицинск училищ төгсәһәд, эн күч-көлснә хаалһан Полынный селәнд эклсн билә, хөөннь төрскн селәнә эмнлһнд көдлв. Эн саата күүкд улсин эрүл-менд харҗ, эднд цаһан төр болхд нөкд болдг билә, тегәд Зинаида Саранговнан дөңгәр һарсн бичкдүдиг тоолхд зөвәр күнд болх гиҗ сангдна. Сүл тавн җилин эргцд күүкд күн селәнд лавк секәд, арһлач болҗ үүлдҗәнә.

- Урднь мана селәнә эмнлһнд ах эмч болн дөрвн медицинск эгч көдлдг билә. Зүркнә гемтә болад, эрдмәрн көдлдгән уурад, ачта амрлһнд һарв. Тавн җил хооран эврә керг бүтәҗ, лавк секх шиидвр авад, үүлдврән эклләв. Мана лавкд хот-хол болн олн зүсн эд-тавр хулдгдна. Бидн Элстәс, хам-хоша бәәдг Әәдрхнәс болн Аһшас эд-тавр авч ирнәвидн. Бәәрн улс ямаран хот-хол, эд-тавр таасч авдгиг учртан авнавидн. Зәрм улс, хамгин түрүнд медәтнр Цаһан Амн селә эс гиҗ Элст балһс оддг арһ уга болна, тегәд герт, эдл-ахуд керглгддг эд-тавр авч ирнәвидн. Дәкәд мөңгн уга болхла, җалван эс гиҗ пенсян автлнь хулд кех арһ өгнәвидн. Би эн селәнд өсәд-боссн күмб, тегәд цугтаһинь сәәнәр меднәв, кен негнь элгн-садн болна, зәрмснь хамдан сурч-көдлҗ йовсн үүрмүдм болна. Эцкм Бусыров Саранг Бадмаевич урднь автолавкд көдлдг билә, малын хошмудар йовад, олн зүсн эд-тавр хулддг бәәсмн. Би бичкнәсн авн нөкд болдг биләв, тегәд лавкчин эрдмиг сәәнәр меднәв, - гиҗ Зинаида Саранговна келнә.
Зинаида Саранговна Владимир Шорваевич авальтаһан түрүләд гер деерән лавк сексн билә. Хөөннь лавк тосхад, Гилән зе күүкнәннь нер зүүлһв. Бәәрн һартан өөтә залу улс Нарна Анатолий болн Бембин Владимир лавкин нерин самбр кеҗ өгв. Лавк бичкн болв чигн, энд селәнәхн хот-хол, зер-земш, темс, нань чигн олн зүсн эд-тавр хулдҗ авна. Кергнь ик олз-ору авч ирдго болв чигн эдн нег һазра улсиг кергтә эд-таврар тетксн деерән тааста кергән делгрүлҗ үүлдҗәнә. Харба селәнә муниципальн бүрдәцин толһач Мухаран Татьянан келсәр, эдн буйнч седклин кергт шунмһаһар орлцҗ, демән күргнә. Сән авъяст тохрсар, Алдр Диилврин, медәтнрин, хальмг улсиг цааҗла харһулсна санлын өдрмүдт эдн көгшдиг хот-хоолар теткнә, бичкдүдиг харслһна нарт-делкән өдрлә бәәрн күүкд-көвүдиг шикра-балтаһар тоона.
Таңһчин эрүл-менд харлһна халхар олн җилдән үнн-чик седклтәһәр көдлсн төләдән Манҗин Зинаида Хальмг Таңһчин күндтә иргнә нер зүүнә, нань чигн кесг ачлвр болн Күндллһнә һашг энүнд бәәнә. Дассн эрдмәрн олн җилдән көдләд, ачта амрлһнд һарсн күүкд күн тааста керг олҗ күүкдтән дөң болҗахнь эн арһта, көдлмшч, седвәртә күн болҗахиг медүлҗәнә.
Владимир Шорваевич болн Зинаида Саранговна Манджиевихн дөчн һар җилдән ни-негн бәәнә, күүкн-көвүндән чик сурһмҗ өгв, ода зурһан ач-зеедән нүдн-амн болна. Күүкн-көвүндән нөкд болхар тавн җил хооран эн кергән бүтәсмн. Ирина күүкнь өрк-бүлтәһән төрскн селәндән бәәнә, эн олн үртә эк болна. Ода күүкнь саата бәәнә, дөрвдгч үрнь һархмн, тегәд Зинаида Саранговна нөкд болҗ лавкчар көдлҗәнә. Экнь, Гиләш Музгановна Бусырова күүкн-күргнәннь килмҗтә хәләврт бәәнә. Ирх җилд медәт 95 насна өөнән темдглхмн. Көгшн экдән, күүкдтән, ачнр-зеенртән ицлтә түшг болҗ йовх күүкд күүнә чидл-чииргнь икдҗ, олн җилдән олзта-тустаһар үүлдҗ йовхиг дурдҗанавидн.

ДООҖАН Наталья
ЗУРГТ: Харба селәнә арһлач Манҗин Зинаида лавкдан