Цергчнрин эрүл-менд батрулна

П.Жемчуевин нертә таңһчин эмнлһнә көдләчнр цергә шишлң керг-үүлдврт орлцачнрин эмнлһнә болн эрүл-менд батруллһна кергт ик тәвцән орулҗана. Шав авсн цергчнр эмнлһнә әңгүдт өөдән чинртә эмнлһ авна, кергтә болхла эднд месллһ кенә болн реабилитацин керг-үүлдврмүд давулна. Цергә шишлң керг-үүлдвр эклснәс авн таңһчин эмнлһнә көдләчнр миңһн һар цергчд дөңгән күргв. Одахн Хальмг Таңһчин эрүл-менд харлһна министр Саран Булат болн «Дәәч» гидг цергә болн спортивн белдврин төвин әңгин һардач, ЭГС-ин депутат Чумуда Николай таңһчин эмнлһнә ах эмч Чумпинә Саглрла харһад, СВО-д орлцачнрт дөң күрглһнә төрәр күүндв.

Харһлтд темдглгдсәр, таңһчин эмнлһнә көдләчнр цергчнрин эрүл-менд харлһнд ик тәвцән орулҗадг деерән СВО-д орлцҗадг нег һазра улсин төлә буйнч седклин керг-үүлдврмүд давулҗ, цуг халхин дөң күргнә. Эмчнр эмнлһ авсн цергчнрлә бат залһлда бәрҗ, хөөннь эднә эрүл-мендин бәәдләр соньмсҗ, ямр нег төр учрхла сүв-селвг өгнә. Эн хаврар Әрәсән Федерацин Хүүвин Ахлачин дарук Инна Святенко мана таңһчд ирхләрн, эмнлһ авчадг цергчнрлә харһад, ямаран дөң эднд күргдгиг хәләсн билә. Медицинск реабилитацин әңгд цергчнрт эмнлһ кехин болн эрүл-менд батрулхин төлә шишлң кергсл бәәхиг, бүрдәцин көдләчнр эднд килмҗән тусхаҗ, өөдән чинртә дөң күргҗәхиг күндтә гиич темдглсмн.
«Төрскән харсачнр» гидг шаңһа саңгин таңһчд үүлддг әңг болн эмнлһс хоорнд батлгдсн бооцаһас иштә олн зүсн гемәс саглуллһна керг-үүлдвр бүрдәгднә. Цергә шишлң керг-үүлдврт орлцачнрин эрүл-менд харлһн эркн чинртә төр болна. Тиигәд, эднд балһсна поликлиникд болн райодын эмнлһст эрүл-мендин бәәдл шинҗллһнә керг-үүлдврмүд давулгдна, түрүн медицинск дөң күрггднә. Ямр нег гем илдкгдсн болхла, эднд П.Жемчуевин нертә таңһчин эмнлһнд, гүлгн гемәс хөрлһнә болн психоневрологическ диспансермудт, шишлң медицинск дөң күрглһнә төвд гүн шинҗллт кенә, мергҗлтнр сүв-селвгән өгнә. Эн җилин эклцәс авн 103 ветеран эмчнрт одад, эрүл-мендин бәәдлән шинҗлв. Цергчнрт дөң күргхин төлә таңһчин эрүл-менд харлһна министерств орн-нутгин нүүрлгч эмнлһсин мергҗлтнр манаһур ирҗ шинҗллтс давулхиг бүрдәдгнь темдгтә. Тиигәд, эн хаврар отоларингологийин медицинск шинҗллтин Келн-улсин төвин Әәдрхн балһснд үүлддг әңгин мергҗлтнр мана таңһчд ирсн билә. Эдн цергә шишлң керг-үүлдврт орлцсн 10 күүнә эрүл-менд шинҗлҗ, эмнлһнә туст сүв-селвгән өгсн билә. Нүүрлгч төвин мергҗлтнр 6 күүнд хөөннь месллһ кеҗ, дөңгән күргх гиҗ шиидв. Төвин эмчнр намрар дәкәд мана таңһчур ирхмн гиҗ зуралгдҗана.
Шав авсн ветеранмудт таңһчин эмнлһст дөң күргснә хөөн орн-нутгин сән гисн санаторьмудт эрүл-мендән батрулх путевкар тетклһнә төр бас му бишәр хаһлгдҗана. «Төрскән харсачнр» гидг шаңһа саңгин таңһчд үүлддг әңгин социальн зүүцүләчнр ветеран болһнд онц оньг тусхаҗ, эднә төрмүдиг хаһлҗ дөңгән күргҗ үүлднә. Тиигәд, Әрәсән социальн саңгин медлд үүлддг санаторьмудт цергчнр эрүл-мендән батрулҗ чадна. Үлгүрнь, социальн зүүцүләч Маргарита Кийкова СВО-н ветеран Гечинә Дорҗд дөң күргәд, Хар теңгсин көвәд Анапа балһснд санаторьт амрхд туслв. Социальн зүүцүләч Музран Чимита СВО-н ветеран Хартыла Евгенийд, социальн зүүцүләч Шаран Лейла ветеран Балян Русланд дөң күргәд, бас эн төвд амрх путевкар теткв. «Кристалл» гидг реабилитацин төвд эдн эмнлһ авсн деерән сойлын-спортивн керг-үүлдврмүдт орлцад, балһс һәәхв, талдан цергчнрлә таньлдад сергмҗтәһәр амрв.

ДООҖАН Наталья