Эмчнр хол селәдт одх

Хальмг Таңһчин Толһач Хаска Батун седвәрәр 2024 җилин зунар мана таңһчд түрүн болҗ «Эрүл-менд бәәтн!» гидг керг-үүлдвр бүрдәгдсн билә. Терүнә йовудт эмчнр таңһчин райодар йовҗ, селәнә әмтнә эрүл-мендин бәәдл шинҗлҗ, эмнлһнә туст дөң күргсн билә. Шидр Хальмг Таңһчин эрүл-менд харлһна министр Саран Булат олнд зәңгллһнә эв-арһсин көдләчнрлә харһад, урднь болсн керг-үүлдврин ашин болн эн җил ямаран шинрлтс орулгдсна тускар келҗ өгв.
- Таңһчин Толһачин даалһврар ноха сарин 1-әс авн һаха сарин 5 күртл «Эрүл-менд бәәтн!» гидг керг-үүлдврин һурвдгч девсң болхмн. Эмчнрин бригадт хамгин түрүнд кардиолог, невролог, уролог эмчнр орхмн. Тер мет талдан мергҗлтнр селәдин әмтнә эрүл-мендин бәәдл шинҗлҗ, эмнлһнә туст сүв-селвг өгхмн. Эн җил эмчнрин бригадт психолог орв, эдн цергә шишлң керг-үүлдврт орлцсн улст болн эднә өрк-бүлмүдт дөңгән күргхмн. Района эмнлһнә улд бәәрн улс эмчнрт бийән үзүлсн деерән мобильн комплекст маммографин, флюорографин, УЗИ шинҗллт кеҗ чадхмн. Өдгә цага кергсл олзлгдҗ цусна шинҗллт кеҗ, гүлгн гем, С гепатит болн нань чигн әәмшгтә гем илдкҗ авгдхмн. Райодын муниципальн бүрдәцсин толһачнрла болн эмнлһсин ах эмчнрлә эн керг-үүлдвр бүрдәлһнә, хол селәдәс әмтиг авч ирхин тускар күүндәд, эмчнрин хәләврт орх улсин то-диг белдвидн. Медәтә, гемтә-шалтгта, хуучта улст, ветеранмудт эмчнр онц оньг тусхахмн. Дәкәд цергә шишлң керг-үүлдврт орлцачнр эн кергт орлцхин тускар «Төрскән харсачнр» саңгин таңһчд үүлддг әңгин һардврла үгцвидн, - гиҗ Булат Амангельдыевич келв.
Эн үвләр болсн керг-үүлдврт ут тоодан 4 миңһн күн эрүл-мендән шинҗлв, теднә тоод цергә керг-үүлдврт орлцсн 17 күн билә. Эмчнрин хәләврт орсн улс дундас 300 күүнд олн зүсн гем түрүн болҗ илдкгдв. Министрин келсәр, эднд немр шинҗллт кегдв, гемнь иткүлгдсн улст таңһчин болн орн-нутгин төвмүдт месллһн болн эмнлһн кегдв.
Өцклдүр «Эрүл-менд бәәтн!» гидг керг-үүлдврин дарани девсң эклв, эмчнр Яшалтан района Ульяновское болн Яшалта селәдт одв. Ирх долан хонгт Көтчнрә болн Лаганя райодт эмчнриг күләҗәнә. Эн керг-үүлдвр һаха сарин 5-д Элстд төгсхмн, эн өдр эмчнр Лола болн Аршан селәдин әмтнә эрүл-мендин бәәдл шинҗлхәр һарч йовхмн гиҗ зуралгдҗана.
ДООҖАН Наталья
ЗУРГТ: Ик Буурла районд «Эрүл-менд бәәтн!» керг-үүлдврин кем
Редакцин архивәс авсн зург