Селәнәхн эмчнр ирснд байрлв

Давсн долан хонгт мана таңһчд «Эрүл-менд бәәтн!» гидг керг-үүлдврин дарани девсң эклв. Яшалтан района Ульяновское болн Яшалта селәдт эмчнр хамгин түрүнд одв. Эн өдр ут тоодан 106 күн эмчнрт ирәд, эрүл-мендин бәәдлән шинҗлв, эмнлһнә туст сүв-селвг авв.

Ульяновское селәнә дунд сурһулин улд эмчнр бәәрн улсиг хәләхин төлә цуг таал тогтагдв. Мергҗлт болһн салу хорад әмтиг хәләв, һаза флюорограф болн маммограф кергсл углҗ тәвгдсн мобильн комплексмүд зогсв. Селәнә бәәрн улс өрүн 8 часас авн нааран адһв. Эрүл-менд харлһна көдләчнр күн болһниг тосад, цусна дарлтынь шинҗлв. Дарунь әмтн мергҗлтнрт бийән үзүлхәр адһв. «Земск эмч» гидг шаңһа көтлврин йовудт нааран ирсн Мацга Диана ода цаг зуур селәнә амбулаторьт терапевтәр көдлҗәнә. Эн Әәдрхнд медицинск ик сурһуль төгсәснә хөөн тенд күсдундур җилдән көдлсмн. Болв төрскн һазртан ирхәр шиидәд, авальтаһан хамдан Яшалтан района эмнлһнд ода көдлдҗәнә. Эдн хоюрн эмчнр болна. Эн өдр баахн эмч кесг кү хәләҗ, эрүл-мендән батруллһна, олн зүсн гемәс саглуллһна туст сүв-селвг өгв. Диана Михайловнан тоолврар иим керг-үүлдврмүд эрк биш давулх кергтә.
Селәнә бәәрн күүкд күн Гульзада Азалова эмчнр ирхиг соңсад нааран ирв. Энүнд цуснднь шикрин кемҗән өөдлнә, тегәд эндокринологин сүв-селвг авч, маммографь болн флюорографь кев. Селәнә эмнлһнд эмч болн дунд медицинск көдләчнр көдлнә, кергтә эм өгнә, эмнлһ кенә, түргн дөң күргнә гиҗ күүкд күн ханлттаһар келв. Келхд, эн селәнд өсәд-боссн Руслан Ниязов Сальскд медицинск колледж төгсәһәд, 2012 җиләс авн бәәрн эмнлһнд көдлҗәнә. Эн бичкнәсн авн эрүл-менд харлһна көдләч болх саната бәәсмн. Энүнә Фарида эгч бас эрүл-менд харлһна халхд көдлҗ йовна. Руслан Ильсовичин медлд селәнә бөдүн улс бәәнә, ода энд 1175 күн бәәнә. Медицинск эгч Наталья Слоницинан хәләврт болхла бичкдүд бәәнә, сүл кесн то-дигәр теднә то 670 болна. Селәнд өнр-өсклң өрк-бүл дала, эк-эцкнр баһ гиснь һурвн-дөрвн үр һарһна.
Эмчнр үд күртл Ульяновское селәнд көдләд, үдин хөөн Яшалта селәнд одв. Тенд әмтн бас эмчнр ирхиг күләҗәснь медгдв. Офтальмолог, кардиолог, эндокринолог, невролог, хирург, отоларинголог, акушер-гинеколог эмчнр асхн күртл бәәрн улсиг хәләҗ, дөңгән күргв. Эмчнрт ирсн улс дунд цергә шишлң керг-үүлдврт орлцсн Михаил Елясов билә. Эн мобилизацин йовудт СВО-д тусад, 2022 җиләс авн эн җил күртл церглв. Эк-эцкнь гемнснә учрар эн цергәс бууҗ ирв. Михаил Анатольевич ода района хаалһин әңгд көдлҗәнә. Эмчнр ирхиг соңсад эн эрүл-менд бәәдг болв чигн цаг олад шинҗллт кехәр ирв. Залу күүнә келсәр, района эмнлһнә эмчнр энүнлә бат залһлда бәрҗ, эрүл-мендин бәәдләрнь соньмсна, чик авг-бәрцин, ямр нег гемәс саглуллһна туст сүв-селвг өгнә. Района әмтнә төлә иим керг-үүлдвр бүрдәсиг эн өөдәнәр үнлҗ, ханлтан өргв.
Яшалтан района эмнлһнә ах эмч Занда Адудован келсәр, иим керг-үүлдвр хол селәдт бәәдг әмтнд мергҗлтнрлә харһад, сән чинртә дөң авх арһ өгнә. «Хальмг Таңһчин Толһач Хаска Батун седвәрәр бүрдәгдсн керг-үүлдврин йовудт олн зүсн гем эртәснь илдкәд, дарунь гүн шинҗллт болн эмнлһ кехд туслна. Района әмтн эн керг-үүлдвриг байртаһар тосв. Мана эмнлһнә мергҗлтнр дару-дарунь селәдәр одад, бәәрн улсин эрүл-менд шинҗлнә. Болв ода мана эмнлһнд уга мергҗлтнр ирснь темдгтә. Селәнәхн эмчнрт бийән үзүлхәс урд цусна дарлтан шинҗлв, цусан өгв, УЗИ, маммографь, флюорографь кев. Эмчнр энд ут тоодан 106 кү хәләв, эрмдгтә болн күнд гемтә 4 күүнд гертнь одв. Цергә шишлң керг-үүлдврт орлцсн нег һазра залу күн бас эмчнрт ирәд, эрүл-мендин бәәдлән шинҗлв, эмчнр энүнд сүв-селвг өгв. Керг-үүлдврин ашар нег күн П.Жемчуевин нертә эмнлһнд эмнлһ авлһнд йовулгдв, 6 күүнд ямр нег гем түрүн болҗ илдкгдв, 2 күүнд немр шинҗллт кех кергтә гиҗ эмчнр шиидв. Медәтнрт, күч-көлснә ветеранмудт, эрмдгтә улст эмчнр онц килмҗ тусхаҗ, күн болһна сурврт тодрха хәрү өгв», – гиҗ Занда Юрьевна келв.
Өцклдүр эмчнрин бригад Көтчнрә района төв селәнд болн Көглтд одв, маңһдур болхла Лаганя района Северный селәнә болн Лагань балһсна әмтнд дөңгән күргхмн. Эн долан хонгт «Эрүл-менд бәәтн!» гидг керг-үүлдвр Сарпан района Уманцево болн Садовое селәнд болхмн. Һаха сар күртл эмчнр таңһчин район болһнд одх. Хальмг Таңһчин эрүл-менд харлһна министр Саран Булатын темдглсәр, медәтә, гемтә-шалтгта улст, күч-көлснә ветеранмудт, цергә шишлң керг-үүлдврт орлцачнрт болн теднә өрк-бүлмүдт онц оньг тусхагдхмн.
ДООҖАН Наталья
ЗУРГТ: цергә шишлң керг-үүлдврт орлцач Михаил Елясовд шинҗллт кеҗәх кем