Селәнәхн эмчнрин хәләврт орҗана

Эн долан хонгт «Эрүл-менд бәәтн!» гидг керг-үүлдвр Көтчнрә, Лаганя болн Сарпан райодт болв. Эмчнр эн райодын селәдт одад, бәәрн улсин эрүл-мендин бәәдл шинҗләд, эдниг соньмсулҗах сурврмудт хәрү өгәд, эмнлһнә туст сүв-севлгән өгв. Маммограф, флюорограф углҗ тәвгдсн шишлң көлгн эмнлһсин өөр зогсв, тегәд күн болһн гүн шинҗллт кеҗ чадв.

Көтчнр селәнд эмчнр поликлиникин улд әмтиг хәләһәд, үд күртл энд көдлв. Эн өдр района талдан селәдин әмтн бас эмчнрт бийән үзүлхәр ирв. Эмчнр күн болһнла күүндәд, ямаран немр шинҗллт кехинь, эрүл-мендән батрулхин төлә чик авг-бәрцәр бәәхин туст сүв-селвг өгч, хуучта болхла эмиг тасрлтан угаһар олзлҗ мергҗлтнрин хәләврт бәәхиг заав. Алцңһуд селәнәс ирсн Муткан Кермн селәнә әмтнә төлә иим керг-үүлдвр бүрдәснд ханлтан өргв. Күүкд күн өрүн эрт нааран ирәд, зүркнә эмчд бийән үзүлхәр чеерүдт зогсв. Эмч Арслана Кермн күүкд күүнлә күүндәд, эрүл-мендән батрулҗ гем-шалтг уга бәәхин туст сүв-селвг өгв. Эн өдр эндокринолог Манган Байрта бас кесг кү хәләв. Эн олн җилдән эрүл-менд харлһна халхд көдлҗ йовх төләдән байн дамшлтта болн өөдән мергҗлттә эмч болна, тегәд селәнәхн эмчд бийән үзүлхәр адһв.
Үдин хөөн эмчнр Көглт селәнд одад, бәәрн эмнлһнә улд әмтнд дөң күргв. Селәнәхн эмчнр ирснд байрлад, дор ормднь гүн шинҗллт кеҗ болхиг үнлв. Нег үлү хол хаалһд йовхд күнд болдг медәтнр кардиолог, невролог, эндокринолог, офтальмолог, отоларинголог, хирург, гинеколог эмчнрт бийән үзүлҗ, флюорографь болн маммографь кеҗ болхиг темдглв. Эн өдр 62 күн эмчд бийән үзүлҗ чадв. Иим керг-үүлдврмүд хол селәдин әмтнә төлә эрк биш бүрдәх кергтә гиҗ эдн ханлттаһар келв.
Көтчнрә районд болсн «Эрүл-менд бәәтн!» гидг керг-үүлдврин йовудт ут тоодан 213 күн эмчд ирв. Района 56 күүкн күн маммографь, 24 күн УЗИ-шинҗллт кев, 18 күн флюорографьд орв. Эмчнрин хәләврт орсн улс дунд хойр күүнд түрүн болҗ ямр нег гем илдкгдв, эднд немр шинҗллт кегдхмн. Тер мет тавн күн эмнлһ авлһнд йовулгдв.
Лаганя районд эмчнр Северное селәнд болн Лагань балһснд әмтиг хәләв. Ут тоодан 160 күн эмчнрт бийән үзүлв, эдн бас маммографин, УЗИ, флюорографин шинҗллт кев. Района эмнлһнә ах эмчин дарук Манҗин Светланан келсәр, «Эрүл-менд бәәтн!» гидг керг-үүлдвр болхин тускар урдаснь әмтнд медүләд, медәтнрт, күч-көлснә ветеранмудт, цергә шишлң керг-үүлдврт орлцачнрт болн эднә өрк-бүлмүдт онц оньг тусхагдв. Северное селәнд фельдшерск пунктд, Лаганьд болхла района эмнлһнә улд эмчнр көдлв. Келхд, района эмнлһнд цуг мергҗлтнр бәәнә, тегәд эдн эврә арһ-чидләрн шинҗллтс кеҗ, әмтиг хәләв. Северное селәнд фельдшер Сагира Мендалиева тәвн һар җилдән көдлҗәнә, тегәд эн бәәрн улсиг сәәнәр меднә, кенд ямаран эмнлһн, шинҗллт кергтәһинь диглнә. Эн өдр 51 бәәрн күн эмчд бийән үзүлв, теднәснь 10 күүнд эмнлһнә туст чиклвр орулгдв, 6 күүнд немр шинҗллт кех селвг өггдв, 30 күн эмнлһнд орхмн гиҗ шиидгдв.
- Цергә шишлң керг-үүлдврт орлцачнрт болн эднә өрк-бүлмүдт онц килмҗ тусхаҗ, эмнлһнә туст сүв-селвг өггдв. Северное селәнд 5 цергчин экнр эмчнрт бийән үзүлв, Лаганьд болхла 5 цергч болн эднә өрк-бүлмүдин 8 гешүн эн керг-үүлдврт орлцв. Цергчнр болн эднә өөрхн улс мергҗлтнрлә харһад, эрүл-мендин бәәдлән шинҗлсн деерән психологла харһад күүндв. Тер мет эмчнр мөч тату, гемтә-шалтгта улст гертнь одад, дөңгән күргв. Тиигәд, Лагань балһснд мана мергҗлтнр 7 күүнд гертнь одад, эмнлһнә туст сүв-селвг өгв. Эн керг-үүлдвр мана районд өөдән кемҗәнд бүрдәгдҗ давулгдв, немр шинҗллт болн эмнлһн керглгдҗәх улс эмчнрин онц оньгт бәәнә, - гиҗ Надежда Сангаджиевна келв.
Өцклдүр эмчнр Сарпан района Уманцево болн Садовое селәнд одв. Ирх долан хонгт эн керг-үүлдвр Приютна, Үстин болн Городовиковск райодт болхмн. «Эрүл-менд бәәтн!» гидг керг-үүлдвр Хальмг Таңһчин Толһач Хаска Батун седвәрәр давсн җиләс авн давулгдҗана.

ДООҖАН Наталья
ЗУРГТ: «Эрүл-менд бәәтн!» гидг керг-үүлдвр Көтчнрә районд
болҗах кем