Медәтнр сергмҗтәһәр амрна

«Ах үйин улс» гидг орн-нутгин көтлврин болн «Өрк-бүл» гидг келн-улсин төсвин йовудт Лаганя районд эн җил хаврар ах үйин улсин төлә «Алтн цаг» гидг төв секгдв. Әрәсән социальн саңгин райодт үүлддг әңгин болн әмтнә социальн теткврин комплексн төвин көдләчнр бәәрн медәтнрин бәәдл-җирһлин таал ясруллһна керг-үүлдврмүд бүрдәнә. СФР-ин региональн әңгин һардач Ивана Чиңһс болн района муниципальн бүрдәцин толһач Коган Юрий төв секлһнд нерәдгдсн байрин керг-үүлдврт орлцҗ, эн төвд медәтнрин төлә соньн керг-үүлдврмүд бүрдәгдҗ, эдн хоорндан бат залһлда бәрҗ, хамдан цаган тустаһар болн сергмҗтәһәр давулхин төлә сән таал тогтагдхиг темдглсн билә.

Медәтнрин төлә төв секгдәд, хойр сар болв. Эн ахр цагин эргцд ах үйин төлә кесг соньн керг-үүлдвр, харһлт бүрдәгдв. Төвин үүлдврин зура батлгдв, шунмһа болн седвәртә медәтнр дундас хүүв тогтагдв. Района әмтнә социальн теткврин комплексн төвин психолог Сакила Гернзл медәтнрлә чик авг-бәрцин тускар күүндәд, ямр нег төрт даргдҗ гейүрлго сән-сәәхн бәәхин төлә сүв-селвг өгв. КЦСОН-а медлд техническ эв-арһсиг цаг зуур олзллһнд авч болхин тускар мергҗлт Людмила Стрелкова зәңглв. Лаганьд үүлддг дотр-дундын кергүдин әңгин штабин һардач Йиснә Андрей болн юрист Никадан Сабина мек һарһад медәтә улст худл-хов келәд җиңнүлдг улсла бийән чикәр бәрҗ, эднд меклгдшгон тускар бас харһлт давулв. Полицин көдләчнр мадниг соньмсулсн төрмүдәр цәәлһвр өгәд, мек һарһдг улс худл келҗ ямр кевәр күүнә мөңг авдгин тускар тодрхаһар келҗ өгв. Иим харһлтс ах үйин улст эрк биш туста болна.
Шидр болхла «Алтн цаг» төвин керг-үүлдврмүдт шунмһаһар орлцдг 16 медәт Җалһа селәнд одад, бадм цецг һәәхв. Түрүләд бидн «Галсанг хурлд» одвидн. Тенд селәнә дегтрин саңгин көдләч Увшан Светлана мадниг байртаһар тосад, хурлын тууҗин тускар келҗ өгв. Ода хурлд лам уга, тегәд эн күүкд күн ирсн гиичнриг тосад, соньн экскурсь давулна. Би Бурятьд одхларн Иволгинск дацанас авч ирсн хадг болн Байкал нуурин чолу бәәрн хурлд белгләд, бәрцән өгв. Эн хурлыг Дала Ламин Гегән 1992 җилд мана таңһчур залрҗ ирсн цагтан әрвслсн билә, энд ик багшин белглсн хойр шүтән бәәнә. Дәкәд Дала Лам суусн ширә бәәнә, гиҗ Светлана Николаевна маднд келҗ өгв.
Хөөннь бидн селәнә сойлын Герт одвидн. Тенд эврә сән дурар үүлддг ансамблин гешүд билг-эрдмән үзүләд, мадниг байртаһар тосв. Җалһа селәнә бәәрн улс ирсн гиичнриг хальмг авъясар тосад, бәәсән үзүләд, цәәһәр тооһад маднд ик байр үүдәснд бидн ханлтан өргҗәнәвидн. Ачта медәт Нимгрә Елизавета бас ду дуулв, кесгнь дор ормдан тесч чадад босад биилв. Хальмг улсин шүлгч Увшан Иван эврәннь шүлгүдән маднд умшв. Дарунь мадниг бадм цецг урһҗах бәәрн һолд авч одв. Цаһан Зинаида усна эзнд бәрц бәрәд, йосрхл кев. Мадн оңһцар усчад, ке-сәәхн бадм цецг хәләҗ сергмҗтәһәр амрвидн.
«Алтн цаг» төвин медәтнр Лаганя района толһач Коган Юрийд, сурһуль-эрдмин болн сойлын заллтын һардач Очра Мергнд, социальн саңгин районд үүлддг әңгин клиентск цергллтин медәтнрин төвин һардач Васкян Цаһанд, КЦСОН-а һардач Увшан Аннад, района күүкд улсин хүүвин ахлач Коган Нарнд ик ханлтан өргҗәнә. Ах үйин улст килмҗ тусхаҗ, цаһан седкләсн иим соньн керг-үүлдврмүд бүрдәснь ик буйнта болтха. Медәтнрин төлә иим төв секснь ах үйин улст эрүл-мендин тускар ухалҗ, цогц-махмудан батрулҗ, удан цагт чаңһ-чиирг бәәхд, насарн цацу улсла харһад, цаган тустаһар болн сергмҗтәһәр бәәхд ик урмд өгнә.

ОЧРА Авдотья,
Хальмг Таңһчин ачта багш, «Алтн цаг» төвин гешүн
ЗУРГТ: Җалһа селәнд бадм цецг һәәхсн кем