«Җаңһр» – өвкнрин аһу ик зөөр

Сегодня, 15:02 | Новости, Таңһчин зәңгс, Зіњг

Эн җил хальмг улсин «Җаңһр» баатрльг дуулврин 585 җилин өөн болҗана. Хальмг Таңһчин Толһач Хаска Батун темдглсәр, Хальмгин өрк-бүл болһнд, тер тоод Хасиковихнә бүлд, эн дуулвр онц чинр зүүдг үүдәвр болна.
«Җаңһрин баатрмуд мини төлә зөрмг үүдәҗ үлгүр болҗ өссн биләв. Арслңгин Арг Улан Хоңһр мини дурта баатр бәәсмн, эн һоллгч баатрмудын негнь болна, эврәннь улсиг харсхдан кезә чигн белн бәәнә, дуулврт хойр бөлг Хоңһрт нерәдгдсмн, терүнд энүнә зөрмг йовдлмудын тускар келгдҗәнә. Элстд Хоңһрт нерәдгдсн бумб мана балһснур ирҗ йовх гиичнриг тосна», - гиҗ Бату Сергеевич келв.
1906 җилд Очра Номт алдр җаңһрч Ээлән Овлата таньлдсмн. 1910 җилд болхла эн профессор Владислав Котвичлә хамдан «Җаңһр» дуулврин түрүн дегтр барлсмн. 1940 җилд мана таңһчд алдр дуулврин 500 җилин өөн өргнәр темдглсиг тодлад, Хаска Бату тер цагт бәәсн җаңһрчнрин нерд сергәв. «Эндр «Җаңһр» дуулвриг шинҗллһнә керг делгрҗәнә, дуулврин 28 бөлг бичгдсн бәәнә, өдгә цага җаңһрчнр Карун Владимир, Тербатан Очр, Мукөвүнә Кутлан, Манҗин Батр, Шаран Дмитрий болн нань чигн улс әрүн кевәр хадһлҗ йовна. Мана дуулвриг хадһлхин болн делгрүлхин төлә бидн дигтә-дарата көдлмш кеҗәнәвидн, тиигәд «Җаңһр» даслһна төв секгдв, сурһульмудт кичәлмүд болн керг-үүлдврмүд давулгдна, номтнр болхла Әрәсән болн нарт-делкән хургудт орлцна. Удл уга мана таңһчд дуулврин өөнд нерәдгдсн керг-үүлдврмүд болхмн. Элстд шаҗна нарт-делкән ик хургин йовудт өргмҗтә болн байрта джангариад болхмн, район болһнд өдгә цага җаңһрчнр дуулвриг олнд соңсхад олн-әмтнә седкл байсах. «Җаңһр» – энтн мана өвкнр маднд үлдәсн үнлҗ болшго байн зөөр мөн. Умштн, дастн, дарук үйнрт терүг күргтн», – гиҗ таңһчин Толһач темдглв.
БАТАН Сәәхлә

Видео