«Родина» төвин талвң шинрүлгдв

Нидн Элст балһсна әмтн «Балһсна сән кец-таал тогталһн» гидг орн-нутгин көтлврин йовудт дууһан өгәд, «Родина» төвин талвңд сән кец-таал тогталһна төсвиг шүүҗ авсн билә. Шидр Элст балһсна һардврин толһач Лиҗикә Алдр эн талвңгиг шинрүллһнә көдлмш төгсснә тускар зәңглв.
- Сойлын төвин талвңд сән кец-таал тогталһна көдлмш төгсснь ик байрта болн бахмҗта йовдл мөн. Эн талвңд ясврин көдлмш кехин төлә Элст балһсна бәәрн улс дууһан өгснь темдгтә. Ода мана элстихн болн гиичнр өрк-бүләрн нааран ирҗ, цаган сергмҗтәһәр давулхд сән таал бәәнә. Энд сууһад амрх сандлмуд, шам, сүүдр өгдг тосхлтс бәәнә. «Родина» төвин талвңд углҗ тәвгдсн улан өңгтә чолун мана теегт хавртнь цецгәрдг бамб цецгүд мет энд-тенд улана. Дәкәд энд «Э» гидг үзг кегдснь өвәрцтә болн үзмҗтә болв. Энд һурвн LED-экран тәвгдснь бас олн әмтнә оньг авлна, – гиҗ Алдр Васильевич келв.
«Родина» сойлын төвин герин ора деер һартан ааһ бәрҗәдг күүкнә болн тосхачин бумблвс углгдсн бәәнә. Элст балһсна һардврин толһачин дарук Довгопола Дмитрийин келсәр, күүкнд Элистина нер өгсмн, тосхач болхла Нарн нертә болв. Элст балһсна өөнд нерәдгдсн байрин керг-үүлдврт Элистина күүкд улсиг йөрәхмн. Ода деерән Элистина нертә 50 болн Элст нертә 2 күүкд күн байрт орлцхан медүлв.
Шинрүлгдсн талвңгиг балһсна баһчуд таасад, энд хамдан цаган давулҗахнь байрта. Хол биш бәәдг Элстин техническ лицейин сурһульчнр энд кичәлмүдин хөөн цуглрад, хальмг би дасдгин тускар «Родина» сойлын төвин һардач Утнасна Валентина бахтҗ келв.
Сойлын төвин талвңгиг шинрүллһнә төсвиг Элст балһсна һардврин толһачин дарук Хаска Сергейин һардврт бәәрн мергҗлтнр үүдәҗ белдсмн. Эдн 1938 җилд тосхгдсн төвин герин архитектор Виктор Калмыковин төсвин ул деер хальмг келн-улсин кев-янзта темдгүд немв.
ДООҖАН Наталья