Малчнр үвлд белдҗәнә

Удл уга малчнрин төлә үвлзлһнә дааврта кем эклхмн. Энүг сән аштаһар давулхар таңһчин фермермүд малын теҗәлән эртәснь белдҗәнә. Эдн малын хаша-хаацан ясад, үвлд дааврта кевәр белдврин көдлмшән күцәҗ йовна.

Хальмгин селәнә эдл-ахун министерствин зәңглсәр, таңһчин эдл- ахусар 390,1 миңһн тонн малын хот белдсн бәәнә. Эннь керглгдҗәдг малын хотын 97 процент тогтав.
Эврән урһаҗ авсн малын шүрүн хот белдхин төлә таңһчин эдл-ахуст ут тоодан 10,8 миңһн гектар аһу һазрт өвсн тәргдсн билә. Хулһн сарин чилгчәр кесн то-дигәр, малын шүрүн хотын кемҗән 135,8 миңһн тонн тогтав. Тер мет 153,5 миңһн тонн малын хот хулдҗ авгдв. Эн җилин хаврин-зуни кемд хур икәр орад, өвсн элвгәр һарв. Эннь малын хот белдлһнд бас туслснь лавта.
Немхәс, эн җил таңһчин селәнә эдл-ахун көдләчнр дәкнәс хамгин элвг урһц хураһад ончрсн билә. Җил болһн малчнр олн зүсн көтлврмүдт орлцҗ, шаңһа дем авна, эннь кергән делгрүллһнд эрк биш туслна. Тер мет Хальмг Таңһчин Толһач Хаска Бату селәнә эдл-ахун көдләчнрин үүлдврт онц оньган тусхаҗ, цуг халхарнь дөңннә. Үвлд икәр эс киитрхлә, ирх җилд буудян урһц элвгәр авгдх гисн иткл бәәнә.

ОЛЬДАН Цаһан