Урһц хуралһна кем төгсчәнә

Җил болһн таңһчин селәнә эдл-ахун көдләчнр элвг урһц хураһад, олз-оруһан икдүлнә. Кесг җил дарандан мана фермермүд Өмн үзгин дуһргт, тер мет Әрәсәд ончрад йовна. Эн җил урһц хуралһна кем сән йовудтаһар давв, гиҗ келҗ болхмн.

Октябрьск районд эн дааврта керг-үүлдвр яһҗ давҗахин тускар медхәр РМО-н АПК-н халхин делгрлтин әңгин һардач Китән Баатрла күүндвидн. Эн җилд Октябрьск районд 687 гектар аһу һазрас 1573 тонн ичмә, 1125 гектар тәрәнә һазрас – 2966 тонн цаһан буудя хурагдв. Тер мет эн районд сән чинртә тутрһ урһаҗ авдгинь цугтан меднә. Әрәсән селәнә эдл-ахун Министерствлә батлсн бооцана ашт эн җил тутрһин тәрәнә һазрин аһу икдв. Баатр Петровичин келсәр, ут тоодан 4251 гектар аһу һазрт тутрһ тәргдсн билә. «Боярин», «Рапан», «Фрегат», «Патриот» болн талдан чинртә тутрһ Октябрьск района эдл-ахуст урһагдна. Тодлхас, шаңһа дөң күргснә ашт усна үннь даңцагддг болв.
Өдгә цагт Октябрьск районд «50 лет Октября», «Возрождение», «Исток» болн «Калмыцкая рисовая компания» нертә бүрдәцс тутрһ урһана. Ик Царңга тутрһ Әрәсәд сән гисн чинртә тоод ордгнь лавта. Эн өдрмүдт тутрһин урһц цааранднь хурагдад бәәнә, дааврта көдлмшт 30 һар комбайн, 9 трактор, аца зөөдг 11 машин болн талдан шишлң техник олзлгдҗана. Шидр кесн то-дигәр 3215 гектар аһу һазрас 13155,8 тонн тутрһ хураҗ авгдсн бәәнә, дундлад келхлә нег гектарас 40,9 центнер тутрһ хурагдҗана.
Тутрһ тәрлһнә һазрин аһуг икдүлһн эннь йосна болн селәнә эдл-ахун арһлачнрин хамцу көдлмшин күсл болҗана. Эн керг таңһчин Толһач Хаска Батун онц бүртклһнд бәәнә.
ОЛЬДАН Цаһан