Нег һазра улсин җирһл ясрулхар

Наталья Верговская бәәрн залврин бүрдәцст 2008 җиләс авн көдлҗәнә. Түрүләд эн Целинн района Овата селәнә муниципальн бүрдәцин һардврт нүүрлгч мергҗлт болҗ көдлҗәсн билә, сүл долан җилин эргцд Наталья Руслановна СМО-н толһачин үүл дааҗана. Нег һазра улс энүг дөңнҗ, селәнә делгрлтин төлә күцәҗәдг көдлмшинь өөдәнәр үнлнә.

Селәнд тавн зун һар күн бәәнә. Энд хальмг, орс, чечен, даргин, немш болн нань чигн талдан келн-улсин элчнр нег-негнәннь сойл, авъяс күндлҗ, хоорндан ниитә бәәнә гиҗ селәнә толһач темдглнә. Эдн Цаһан Сар, Масленица, Ураза Байрам болн талдан сән өдрмүдиг хамдан темдглҗ, билг-эрдмән һарһҗ нәәрлнә. Энд ах үйин улсан күндлҗ, селәнә босхмҗд болн делгрлтд орулсн тәвцинь үнлҗ, дөң-тусан күргнә. Чернобыльск АЭС-т учрсн аюл уга келһнд орлцсн Рабаданов Руслан болн Василий Камышанский, Афганистанд церглсн Бадран Юрий күндтә улст тоолгдна. Эндр болхла цергә шишлң керг-үүлдврт орлцҗадг нег һазра залуст болн эднә өрк-бүлмүдт ик оньг өггднә, селәнәхн цергчнрт дулан хувц, хот-хол илгәҗ, буйнч седклин керг-үүлдврмүд давулна.
- Мана селәнд дунд сурһуль, бичкдүдин сад, эмнлһн, пошт, түүмр унтралһна әңг бәәнә. Онц арһлачнр Ирина Горшкован болн Тамара Хахлинован лавкст олн зүсн хот-хол, эд-тавр хулдгдна. Арһлачнр бичкдүдт, медәтнрт килмҗән тусхаҗ, буйнч седклин кергт орлцна. Селәнә бәәдл-җирһлд крестьянск-фермерск эдл-ахусин һардачнр шунмһаһар орлцҗ, медәтнрт, олн үртә өрк-бүлмүдт нөкд болҗ ямр нег төрмүд хаһллһнд демән күргнә. Мана таңһчд алвна мөңгиг амр кевәр өглһнә туст таал тогтагдсна учрар талдан һазрт бәәдг арһлачнр мана СМО-н хазна оруһин әңг икдүллһнд бас туслҗана. Үлгүрнь, арһлач Елена Митрошина буйнч седклин кергт демән күргҗ, дөң болхар шунна. Арһлачнрин, фермермүдин болн района һардврин дөңгәр бидн селәнә әмтнә җирһлин таал ясруллһна керг-үүлдврмүд күцәнәвидн. Келн-улсин төсвсин болн шаңһа көтлврмүдин йовудт селәнә социальн делгрлтин төрмүдиг хаһлнавидн, - гиҗ Наталья Руслановна келнә.
Селәнә бәәрн улс бийснь төрскн һазриннь делгрлтд тәвцән орулхар шундгнь темдгтә. Оватинск СМО 2022 җиләс авн әмтнә седвәр дөңнлһнә көтлврт орлцҗ, кесг төсв күцәв. Тиигәд, эдн бичкдүд нааддг болн спортын талвңгуд тосхв, үкәриг хашалв. Нидн «Әәмшг уга болн сән чинртә хаалһс» гидг келн-улсин төсвин йовудт селәнд тагт ясгдв. Овата селәнә әмтн Төрскән харсгч Алдр дәәнд орлцсн нег һазра улсин санл мөңкрүллһнд ик оньг тусхана. Эн һазрас 92 күн дәәнд орлцад, төрскн һазран хортнас сулдхсмн. Селәнд «Тоһрун шовуд» гидг санлын бумблв бәәнә, терүнд дәәнд орлцсн улсин нерд бичәтә. Дәкәд энд дәәнә цагт әмнәсн хаһцсн А.И.Любченко оршагдсн һазрт бумб босхгдв. Дунд сурһулин багшнр болн сурһульчнр санлын бумблвсиг ахулҗ арднь орҗ сәәнәр хәләнә. Хөрн тавн җил хооран селәнә дунд сурһулин һардач Босхмҗин Андрейин седвәрәр Бодь суврһ босхв, нааран кесг күн ирҗ мөргнә. Тавн җил хооран бәәрн улс терүг шинрүлҗ ясв.
- Бидн олн зүсн көтлврт болн марһаст орлцхар шуннавидн. Селәнә делгрлтин, әмтнә седвәр дөңнлһнә, сән хаалһс тосхлһна көтлврмүдәс нань бидн «Лукойл» компаня социальн төсвсин марһанд орлцнавидн. Тиигәд, эн марһанд шүүсн мөрәһәр мана селәнд үүлддг «Оватиночка» ансамбльд орлцачнрин төлә ке-сәәхн хувц хулдҗ авсн биләвидн. 2024 җилд бидн «Служение» гидг Әрәсән муниципальн мөрән марһанд орлцад, сән кец-таал тогталһна, улсин үүдәлтиг делгрүллһнә болн хуучн бәәриг тустаһар олзллһна туск төсвс белдсн биләвидн. Урднь селәнә эмнлһн бәәсн герт ода орс чонҗин лам ирҗ мөргүл давулна, түүмр унтралһна әңг бас секвидн. Давсн җилин моһа сард «Бичкн Төрскн – Әрәсән күчн» гидг керг-үүлдврт орлцх үрвр нанд кев, тегәд талдан райодын муниципальн бүрдәцсин элчнрлә хамдан Москва балһснд одсн биләв. Сүл цагт бәәрн залврин бүрдәцсин үүлдврт ик оньг тусхаҗ, муниципальн цергллтин көдләчнрин мергҗлт өөдлүллһнә төлә керг-үүлдврмүд давулна. Би Элст балһснд Евгения Черкасован һардврт болсн сурһульд орлцад, талдан селәдин толһачнрин дамшлтла таньлдлав. Иим харһлтс үүлдврән ясрулҗ, өдгә цагин некврлә ирлцҗ көдлхд ик урмд өгнә, - гиҗ Наталья Руслановна келнә.
2024 җилд бәәрн залврин делгрлтин Цугәрәсән ниицән (ВАРМСУ) Овата селәнә муниципальн бүрдәцин толһач Наталья Верговскаян үүлдвриг үнләд, «Бәәрн залврин бүрдәцин сән гисн һардач» гидг нер зүүсн билә.Эн ачлвр селәнә толһачин көдлмш нег һазра улст туста болҗахиг герчлҗәнә.

ДООҖАН Наталья
ЗУРГТ: Овата селәнә муниципальн бүрдәцин толһач Наталья Верговская (барун бийәснь хойрдгчнь) санлын керг-үүлдврт