Бичкдүдин санань күцв

Шидр Хальмг Таңһчин залврин Ахлач Босхмҗин Гилән «Күслин һацур» керг-үүлдврин йовудт бичкдүдлә харһад, Шин җилин белг бәрүлҗ өгв. Шин җилин өмн өргнд Гилән Герасимовна арвн һурвта Татьяна Илькуеван болн йисн наста Манҗин Маркин нертә наадһас шүүҗ авсн билә.
Манҗин Марк Зая-Пандитан нертә хальмг этносойлын гимназин 3-ч классин сурһульч болна. Эн цогц-махмудан батрулдг кергсл белглхиг сурад, бичгән илгәсн билә. Көвүн сурһулян сәәнәр сурна, шүлгүд айслулҗ умшхдан дурта, эсвин олимпиадт эн орлцна. Марк боксар соньмсна, эн гертән эцктәһән эв-дован делгрүлҗ, цогц-махмудан батрулна. Харм төрхд, гемин уршгар көвүн секцд орҗ чадҗахш, тегәд гертнь шишлң кергсл кергтә болҗана. Эднә өрк-бүлд һурвн көвүн өсчәнә, тегәд спортын кергсл цугтаднь эрк биш кергтә болхнь лавта.
Татьяна Илькуева бас сурһулян сәәнәр сурч, олна бәәдл-җирһлд шунмһаһар орлцна. Күүкн С.Радонежскийин нертә Орс Келн-улсин гимназьд сурна. Дәкәд күүкн көгҗмин сурһульд гитар цокдг эрдм дасчана, театральн студьд орна, «Гилвксн одд» гидг балһсна бичкдүдин олна ниицәнә гешүн болна. Нидн Татьяна «Диилврин җивр» көгҗмин марһанд II девсңгин лауреат болв. Күүкн «Алиса» гидг кергслин тускар ухалҗасмн, тегәд «Күслин һацур» гидг керг-үүлдврин сайтд бичгән илгәсн билә. Эднә өрк-бүл өнр-өсклң, күүкн тавн ах-дүүтә. Эдн цуһар эврәннь бичгән илгәһәд, ямаран белг күләҗәхин тускар бичсн бәәҗ, дөрвнь тааста белг авв.
Хальмг Таңһчин залврин Ахлач Босхмҗин Гилән бичкдүдиг шин җиллә йөрәһәд, сурһулян сәәнәр сурад, билг-эрдмән делгрүләд, эк-эцкнртән өлзәтә сән үрд болҗ өсхиг дурдв. «Күслин һацур» гидг керг-үүлдвр бичкдүдин әрүн сана күцәхин төлә давулгдна, тегәд тана байр хувалцҗ, тааста белг бәрүҗ өгч хөв-кишг дурдҗанав гиҗ Гилән Герасимовна келв. Маркин эк Манҗин Сабина болн Татьянан эк Наталья Илькуева Хальмг Таңһчин залврин Ахлач Босхмҗин Гиләнд ханлтан өргҗ, эднә бичкдүдин сана күцәҗ белг бәрүлҗ өгснь ик байр үүдәв гиҗ темдглв.
«Күслин һацур» гидг керг-үүлдвр лу сарин чилгч күртл болхмн. Шаңһа туслмҗин эв-арһар Елкажеланий.рф сайтд орад, күн болһн эн керг-үүлдврт орлцад, бичкдүдин сана күцәҗ чадҗана.
ДООҖАН Наталья