Олна ниицәс мөрә шүүҗ авв

Шидр Хальмг Таңһчд үүлддг олна хойр ниицән президентск мөрән саңгин марһанд диилвр бәрснә туск зәңг ирв. Терүнд орлцсн коммерческ биш 1469 бүрдәцин дунд Хальмгин элчнр диилвр бәрснь темдгтә. Тиигәд, хәәврин багмудын «Калмыкия» ниицән болн Төрскән харсачнрин өрк-бүлмүдин хүүв ут тоодан 3 сай 184 миңһн арслңга мөрә шүүв.
2026 җилин түрүн марһанд 9310 бүрдәц эрлһән орулв, тер тоод мана таңһчин 20 элч билә. Марһана неквриг күцәсн күсдундур миңһн бүрдәцәс 370 бүрдәц түрүн болҗ эн марһанд диилвр бәрв. Теднә тоод Хальмг Таңһчд үүлддг Төрскән харсачнрин өрк-бүлмүдин хүүв орснь ончта. Олна бүрдәц шүүҗ авсн мөңгәр цергә шишлң керг-үүлдврт орлцачнрт болн теднә өрк-бүлмүдин гешүдт өңгәр юридическ дөң күргхәр зуралҗана. Эн кергт Б.Б.Городовиковин нертә Хальмг ик сурһульд юристин эрдм дасчадг оютнр шунмһаһар орлцхмн. Эдн урдаснь шишлң сурһуль сурад, иим көдлмшт белдхмн.
«Калмыкия» гидг хәәврин багмудын ниицән урднь иим марһаст күцәмҗтәһәр орлцҗ ик дамшлт хоршасмн, тегәд терүнд диилвр бәрснь орта болв. Шүүҗ авсн мөрәг эдн «Хәәвр күцәдг күүнә сурһуль» гидг бүрдәц тогталһнд олзлад, дорас өсч йовдг баһ үйд төрскнч сурһмҗ өглһнд, дәәнә тууҗар, хәәврин көдлмшәр болн шинҗллтәр соньмсдг сурһульчнриг болн оютнриг дөңнлһнә кергт олзлхар зуралҗана.