Хаалһст зеткртә йовдлмудыг баһрулхар

Урҗ өдр «Калмыкия» РИА-н барин төвд Хальмг Таңһчин МВД-н ГАИ-н заллтын һардач, полицин полковник Галимджан Нурнахамбетов 2025 җилин көдлмшиннь ашинь диглҗ, эн җилин кех-күцәх тоотын тускар таңһчин седкүлчнрт келҗ өгв.

Галимджан Хасанович 2025 җилин йовудт хаалһст зеткртә ямаран йовдлмуд учрсна тускар тодрхаһар цәәлһв. Түргәр йовлһна кемҗәг икдүләд болн согтуһар көлг залдг улсин гемәр кесг арвад күн әмнәсн хаһцв. Энүг баһрулхин төлә ГАИ-н көдләчнр ирлцңгү керг-үүлдврмүд бүрдәсн билә. Тер мет хаалһсар видеокергсл углҗ тәвгдв, әмтн йовһар йовдг хаалһст толһаһан өрглго телефондан хәләдг болн оньг уга улсин төлә светофорин өмн улан болн ноһан өңгтә татасн бас тәвгдв. Ашлад келхлә цергллтин көдләчнрин бүрдәсн көдлмшәр болн нилчәр хаалһст зеткртә йовдлмудыг долан процентд баһрулҗ болв, әмнәсн хаһцсн улсин то 18,4 процентд баһрв.
Көлг залдгиг дасхдг шишлң сурһульмудын тускар бас күүндвр болв. Эндр мана таңһчд арвн һар тиим сурһуль үүлдҗәнә. Терүнд олн күн сурна, тедн дунд күүкд улсин то икдәд йовна, гиҗ темдглх кергтә.
Эн җилин йовудт ГАИ-н көдләчнр урдк кевәрн сурһуль-эрдмин бүрдәцслә залһлдад, ирлцңгү керг-үүлдврмүдән цаарандан давулхмн. Темдглхәс, 2026 җилд Әрәсән МВД-н медлд бәәдг ГАИ-н заллт 90 җилин өөнән темдглхәр белдҗәнә.
Харһлтын чилгчәр таңһчин седкүлчнр Галимджан Нурнахамбетовд сурврмудан өгәд, тодрха хәрү авч чадв. Галимджан Хасанович болхла, ГАИ-н үүлдврин тускар зәңглдг седкүлчнрт ханлтан өргәд, цаарандан өөрхн залһлдҗ көдлхән медүлв.

ОЛЬДАН Цаһан