Эрмдгтә күн көдлмштә болв

Гемтә-шалтгта улсиг, цергә керг-үүлдврт орлцсн эрмдгтә ветеранмудыг көдлмшәр тетксн бүрдәцс болн арһлачнр көдлмшч орм бүрдәлһнд һарһсн мөңгән даңцахин төлә шаңһа дөң авч чадҗана. Эн дөң «Кадры» гидг келн-улсин төсвин «Көдлмшәр тетклһнд туслһна керг-үүлдврмүд» гидг шаңһа көтлврин йовудт күрггднә. Орн-нутгин хазнас йилһгдҗәдг мөңгнә кемҗән 200 миңһн арслң күртл тогтана.
Городовиковск районд үүлддг арһлач «Бумба» ООО-н һардач Шарапа Данара гемтә-шалтгта күүг көдлмшәр теткәд, эн көтлврин йовудт шаңһа дөң авв. Эн көдлмшч орм бүрдәхин төлә 168 миңһн арслң һарһад, шишлң суудл, компьютер болн нань чигн кергсл хулдҗ авсн билә. Эрмдгтә күүг көдлмшәр теткхин төлә сән таал тогталһнд һарһсн мөңгинь шаңһа көтлврин йовудт даңцав.
БАТАН Наталья