Сән таал тогтагдҗана

Мана таңһчд социальн теткврин 7 стационар бүрдәц үүлдҗәнә, тенд 700 һар медәт болн эрмдгтә күн бәәнә. Эн җил таңһчд үүлддг социальн бүрдәцсин материальн-техническ ул батруллһна көдлмш цааранднь күцәгдхмн.
Тиигәд, Сарпан социальн теткврин герт шин бәәрин тосхлт төгсв. Ода энд бәәдг медәтнрт болн гемтә-шалтгта улст сән таал тогтагдсн деерән көдләчнрин төлә көдлмшч ормс бүрдәгдв. Городовиковск районд бәәдг гер-интернатд бас шин бәәрн тосхгдҗана. Тосхлтын көдлмш төгсснә хөөн медәтнрин болн эрмдгтә улсин төлә немр орм секгдхмн.
Элстин медәтнрин болн гемтә-шалтгта улсин гер-интернатд эн җил «Өрк-бүл» гидг келн-улсин төсвин «Ах үйин улс» гидг көтлврин йовудт өдгә цага шин бәәр тосхлһна көдлмш күцәгдҗәнә. Энд 4 шин корпус тосхгдмн, тенд медико-реабилитационн, сойлын керг-үүлдврмүд давуллһна бәәрн, 120 ормта болн 80 ормта «Милосердие» әңгүд секгдхмн. Тосхлтын йовудт өдгә цага реабилитационн болн технологическ кергсл углҗ тәвгдхмн.
БАТАН Наталья