Амрлһна орм ясгдхмн

Сүл җилмүдт мана таңһчд нег үлү Элст балһснд хаалһс болн амрлһна кесг ормс ясгдад, бәәрн улсин төлә сән таал тогтагдҗана.
Тодлхд, нидн Цугәрәсән марһана ашар Хальмг Таңһчд сән кец-таал тогталһна хойр төсвс күцәгдхмн гисн шиидвр батлгдсн болдг. «Балһсдын болн тууҗлгч селәдин делгрлт» нертә 2025 җилин марһанд орлцхар орн-нутгин регионмудас ут тоодан 424 эрлһн орҗ ирсн билә. Мана таңһчас Городовиковск, Лагань болн Элст балһсд бас эрлһсән йовулсн мөн. Тегәд марһана ашар мана хойр төсв дииләчнрин тоод орв гисн байрта зәңг ирсн билә. Тиигәд Лагань балһснд Ноһан Дәркин парк тосхгдх, Элстд болхла Колонск боодгин эргндк һазрт сән кец-таал тогтагдх болв.
2022 җилд болхла ирлцңгү марһанд диилвр бәрәд, Лаганьд «Көк теңгсин айсмуд» нертә парк эдлврт орсмн. Ода эннь зуульчнр олар ирдг тааста орм болв. Ода сән Өдрмүдән лаганяхн эн паркд сергмҗтәһәр давулна. Тегәд лаганяхн эврә һазран кеерүлсн деерән таңһчд зуульчлһ делгрүллһнә кергт зөвтә тәвцән орулҗахнь лавта.
Элст балһсна бәәрн улсин төлә Колонск боодг зуни цагт усна өөр амрдг ор һанцхн бәәрн болна. Төсвин йовудт тенд шишлң 10 орм бүрдәгдхмн. Амфитеатр, экологическ хаалһ, спортын талвң болн талдан кесг бәәрн эдлврт орх зөвтә.
Лагань балһснд болхла Ноһан Дәркин парк тосхгдад, нег һазра улсин төлә бәәтхә Хальмгт ирдг гиичнрин төлә бас әрүн чинртә, һәәхмҗтә орм болхмн. Эн ке-сәәхн тосхлтс, таңһчд зуульчллһ делгрүллһнд бас туслхнь лавта.
Шидр ведомствин хоорндк багин гешүд Колонск боодгин төсвиг батлв. Эн җил төсв экләд күцәгдхмн. Шаңһа төвин болн Хальмгин Толһач Хаска Батун нилчәр Элст балһснд өдгә цагин некврлә ирлцҗәдг амрлһна шин орм бүрдәгдхмн. Олна күчәр эн төсв күцәгдәд, зуни цагт усна тогталын өөр элстихн болн балһсна гиичнр цаган сергмҗтәһәр давулҗ чадхмн, гиҗ Элстин һардврин ахлач Лиҗикә Алдр темдглв.
КАРСАНА Евгения