«Мана герүр ирцхәтн!»

Орн-нутгин Президент Владимир Путин 2026 җилиг Әрәсән улсин ниицлтин җил гиҗ зарлсмн. Хальмгин Элст хотл балһсн эн җилиг байрин бәәдлд эклхәр белдҗәнә. Олн келн- улсин хот-хол келһнә марһаһар тернь эклхмн.

Элстд «Иньгллт» паркд лу сарин 18-д Әрәсән улсин ниицлтин җил байрин бәәдлд секгдхмн. Эн байрта йовдлла ирлцүлҗ, келн улс болһна хот-хол келһнә марһан болхмн. Байрт «Мана герүр ирцхәтн!» – «Заходите в наш дом!» гисн нертәһәр болх марһан Цаһан Сарин болн Масленица гидг улсин байрла ирлцүлҗ кегдҗәхнь нег үлү ончта болҗана.
Лу сарин 18-д «Иньгллт» паркин Диилврин талвңд 14:00 часла байрин нәр эклхмн. Марһанд орлцачнр эврә келн-улсин байрин ширә белдҗ, терүнд эдлдг хотан эвинь олҗ, кеерүлҗ ирсн әмтнә оньг авлҗ үзх зөвтә. Ширә йир сәәхнәр кеерүлгдсн деерән тер белдсн хотнь шимтә болн сән амтта болх зөвтә.
Марһанд орлцачнрин кесн хотыг шишлң жюри үнлхмн. Эднә өмн ик дааврта төр тәвгдв. Эдн олн хотыг амсад, сәәнинь, амттаһинь, ямаран кевәр терүг әмтнд үзүлҗ тооҗахинь, нань чигн тоотынь йилһх болҗана. Дора заагдсн таалла ирлцүлҗ, хотан белдҗ, ширәһән кеерүлҗ, марһанд орлцачнр әмтнә болн жюрин оньгиг эзлҗ үзх зөвтә.
«Цаһан Сарин хамгин сән амтта ик боорцг», «Нарн мет хамгин сәәхн билән», «Гиичнрән тосч авч келдг хамгин сәәхн йөрәл», «Келн- улсин хотын туск хамгин соньн домг», «Келн- улсин өвәрц», «Хоорндан ниитә хамгин сән ширә».
Марһанд орлцсн әмтн иим олн мөрә шүүҗ авч чадҗана. Шимтә сән хот кесн, терүгән сәәхнәр, һольшгар жюрин болн әмтнә оньгт тусхасн орлцачнр үнтә мөрәһәр ачлгдхмн. Сәәхн эн нәәрт ирсн әмтн болхла, Элстд бәәдг олн келн-улсин авъясмудла таньлдҗ, ямаран хот тедн кедгинь медҗ авхмн. Нег һазрт ни-негн бәәдг олн келн-улсин элчнр байрин эн нәәрлә соньн олн тоотла таньлдҗ сергмҗтәһәр цаган давулхмн. Хамдан эдлсн хотас әмтәхн уга, гиҗ келдг биший.

ҖИРҺЛИН Кермн