Тааста көдлмшнь урмдта болна

Медәтә, гемтә-шалтгта, һанцарн бәәдг улсиг сәәнәр хәләҗ, дөң-тусан күргдг социальн көдләчнр тесвртә, өр-өвч седклтә, әмтнлә тевчңгү болх зөвтә. Эднә көдлмш ик дааврта болна. Һучн тавн җилин эргцд Үстин района әмтнә социальн теткврин төвд көдлҗәдг Чумуда Наталия тиим улсин негнь мөн. Тааста эрдмәрн олн җилдән үнн-чик седклтәһәр көдләд, нег һазра улс дунд күндллһ олсн Наталия Тагировна социальн теткврин халхар насни турштан көдлҗәнә гиҗ келҗ болхмн.
Эрднихн селәнд өсәд-боссн Чумуда Наталия йисн җилдән дунд сурһульд эклц классин багшар көдлсмн. 1991 җилд районд социальн теткврин төв бүрдәгдхлә, эн төрскн селәндән социальн көдләч болхар шиидв. Түрүн арвн җилд энүнә хәләврт нәәмн һар күн билә. Ода Наталия Тагировна тавн медәтиг хәләҗ, эднд нүдн-амн болҗ дөңгән күргҗәнә. Долан хонгт хойр-һурвн дәкҗ медәтнрт геринь ахулҗ, ааһ-савинь уһаҗ, эминь, хот-хоолынь хулдҗ авч, нань чигн даалһвр күцәнә. Селән һазрт кех-күцәх көдлмш баһ биш болна.
- Урднь мана селәнд газ уга билә, тегәд медәтнрт бешинь түлх, арһс, нүүрс белдх кергтә бәәсмн. Малчнрла үгцәд, арһс хошас нааран авч ирҗ урдаснь белддг биләв. Ода гер болһнд газ бәәнә, тегәд үвлднь дулан болна. Гер-бүүринь ахулҗ сән таал тогтаһад, хотынь белднәв. Медәтнр хот-хол, эм нань чигн эд-тавр хулдҗ авхиг сурна, тегәд селәнә эс гиҗ района лавкас болн аптекәс кергтә тоотынь авч ирнәв. Харм төрхд, усна төр нәрн болна, тегәд худгас суулһар ус зөөх кергтә. Мини хәләврт бәәдг медәтнр цуһар һанцарн бәәнә, тегәд герин көдлмш кесн цагтан теднлә күүндәд, ямаран төр бәәхинь соньмснав. Эн җилмүдин эргцд мини хәләврт тәвн шаху күн бәәв. Цуһар эдн нанд элгн-саднла әдл улс болв, олн җилдән эдниг хәләһәд, сүл хаалһднь чигн үдшәх йовдл учрна. Сән өдрмүд болхла бидн нег-негндән бичкн белгән нерәдәд тевчнәвидн, – гиҗ Наталия Тагировна келнә.
Селәнә эмнлһнә көдләчнр бас түрүн сурврар дарунь ирәд, кергтә болхла тәрлһ кеҗ, эрүл-мендин бәәдлинь шинҗлҗ дөңгән күргнә. Района эмнлһнд одх кергтә болхла, социальн көдләч эдниг дахч йовна. Күүкд күүнә келсәр, энүнә хәләврт бәәдг медәтнрәс хамгин настань Ноһан Кисяевна Джанжигаева болна. Найн зурһата көгшн ээҗд онц килмҗ болн оньг тусхаҗ, арднь орҗ хәләх кергтә. Байгазин Савиле, Максан Любовь, Настан Надежда болн Бадмин Владимир бас социальн көдләчин килмҗтә хәләврт бәәнә. Владимир Иванович дегтр умшхдан дурта, тегәд Наталия Тагировна энүнд района төвд эс гиҗ гертнь бәәдг дегтрмүд авч ирнә. Далн зурһата Савиле Куановна шимтә, сенр хот-хол болһна, һуйрин кегдлмүднь йир әмтәхн болна, дәкәд медәт хуучн хувциг ясад шинрүлнә. Чумуда Наталия медәтнрлә олн төрәр күүндвр тогтаҗ, мек-тах һарһдг улсас саглулҗ сүв-селвг өгнә. Дәкәд эн медәтнрин пенсин, гер-бүүрин, мөңг өгъялҗ авлһна төрмүд хаһлҗ эднә даалһврар района цергллтст бас одна.
Олн җилин эргцд социальн теткврин халхд көдлҗ йовдг төләдән Чумуда Наталия района, таңһчин болн орн-нутгин ачлврмудар темдглгдсмн. 2023 җилд болхла мана таңһчд түрүн болҗ Советин Союзин Баатр Б.Б.Городовиковин орденәр ачлсн улс дунд социальн көдләч Чумуда Наталия бас заагдв. Эн ачлвр Наталия Тагировнад хамгин үнтә ачлвр болна. Баһ Дөрвдә районд көдлдг көвүнь-бернь болн хойр ач күүкнь эңкр экдән-ээҗдән гиичлҗ ирхдән дурта. Саша ач күүкнь 1-ч класст орв, Аделина йисн сарта. Наталия Тагировнан келсәр, арһ-чидл бәәһәд, медәтнрт нөкд болҗ көдлх саната.

ДООҖАН Наталья