Өвкнрин туурмҗиг тодлад

Әрәсән найн йисн регионд Сталинградск дәәлдәнә 83 җилин өөнд нерәдсн керг-үүлдврмүдиг «Медрл» ниицәнә элчнр давулв. Мана таңһчд болхла хамгин түрүнд Элстин болн Приютна олн салврта гимназьмүдт болн Әрәсән шаңһа социальн технологин ик сурһулин Хальмгин әңгд ирлцңгү кичәлмүд болв.

Төрскән харсгч Алдр дәәнә йовудт Сталинградск дәәлдән ямр ик чинртә болсна тускар арвтнрт келҗ өгв. Советин Союзин салдсмуд әмән әрвллго, тер догшн дәәлдәнд залу-зөрмгән үзүләд, өшәтиг төрскн һазрас көөҗ һарһв. Тер мет Павловин Гериг сулдхсна тускар көвүд-күүкд бас медв. Эврә дурар дәәлдәнд орлцсн матрос Михаил Паникахинә болн 225 салдсиг уга кесн зөргтә дәәч Василий Зайцевин тууҗин туск келврмүдиг сурһульчнр оньган өгч соңсв.
– Дорас өсч йовдг үйнр орн-нутгиннь тууҗ медәд, төрскнч седклтә улс болх зөвтә. Өвкнрин туурмҗинь болн санлынь тевчәд, кен чигн мартгдшгоһинь чигн эднд медүлх кәргтә, – гиҗ «Медрл» ниицәнә хальмг әңгин һардач Манҗин Элеонора темдглв.

ОЛЬДАН Цаһан