Цергчнрин төрмүд хәләгдв

Шидр Хальмг Таңһчин залврин Ахлачин дарук –таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан һардврт «Төрскән харсачнр» шаңһа саңгин региональн әңгин үүлдврин төрмүдәр бәәдг ведомствс хоорндк комиссин селвлцән болв.
Селвлцәнд цергә шишлң керг-үүлдврин ветеранмудын социальн харслтын, дөң күрглһнә болн нань чигн төрмүд хәләгдв. Тиигәд, «Төрскән харсачнр» шаңһа саңгин региональн әңгин болн МФЦ-н хоорндк нөкцлтин бооцан батлгдхин тускар зәңглгдв. Эн бооцан цергә шишлң керг-үүлдврт орлцачнрт болн эднә өрк-бүлмүдт шаңһа болн муниципальн сән чинртә туслмҗ күрглһнд туслхмн гиҗ күләгдҗәнә. СВО-н ветеранмудт болн эднә өрк-бүлмүдин гешүдт цуг халхар дөң күргхин төлә мергҗлтнр район болһнд йовхин туст зәрм министерствсин элчнрт даалһвр өггдв. Ода цергчнр «бачм залһлдана» 89093985536 тойгар җиңнүләд, олн зүсн төрәр цәәлһвр авч чадхмн.
2026 җиләс авн цергә шишлң керг-үүлдврт орлцачнрт болн өрк-бүлднь социальн бооца батлҗ, шаңһа дем авдг арһ учрв. Хальмг Таңһчин социальн делгрлтин, күч-көлснә болн көдлмшәр тетклһнә министерствин болн «Мини керг» төвин мергҗлтнр цергчнрт социальн бооца батллһна туст селвг өгч, керг бүрдәлһнә зура тогталһнд дөңгән күргнә. «Төрскән харсачнр» шаңһа саңгин региональн әңгин көдләчнр СВО-н ветеранмуд дунд бас цәәлһврин көдлмш давулҗ, социальн бооцана йовудт йилһгдсн шаңһа демиг ямр кевәр олзта-тустаһар олзҗ болхин тускар күүндҗ эднд туслхмн.
Таңһчин залврин Ахлачин дарук Өлзәтин Марина селвлцәнд хәләгдсн төрмүдиг ашлад, цергә шишлң керг-үүлдврт орлцачнрт дөң күрглһнә көдлмшиг шунмһадулх кергтә гисн дуудвр кев. Цергә керг-үүлдврт орлцачнр болн эднә өрк-бүлмүдин гешүд ик зовлң үзсиг учртан авч шишлң багмуд бүрдәһәд, эднд дөң күргһлнә керг-үүлдврмүдиг бүрдәлһнә туст шин эв-арһс олзлх кергтә», - гиҗ Марина Петровна товчлв.

БАТАН Наталья