Чинртә төрәр селвлцв

Шидр Москва балһснд хөөнә ноос эд-бод келһнә төрәр ведомствсин хоорндк штабин селвлцән болв. Хальмг Таңһчин залврин ахлачин дарук Җамбинә Очр болн Әрәсән сенатор Хачирә Борис терүнд орлцв.
Селвлцәнә йовудт кесг төрмүд хәләгдв. Өдгә цагт Интернетин эв-арһ олзлад, олн-әмтн ямр чигн эд-тавр хулдҗ авна. Тер дунд шеемч хувцн болн талдан чигн тоот бас хулдгдна. Энүг уйҗ һарһдг бүрдәцс хөөнә ноос олзлад, деернь талдан утц немәд йоста шеемг хувцн гиҗ хулдна. Тиим йовдлмудыг ууруллһна болн бүртклһнә төрмүдт онц оньг өггдв. Эн төрмүдиг ирлцңгү бүрдәцс хаһлх болв.
Тер мет селвлцәнд талдан төрмүдәр бас күүндвр болв. Чинртә төсвс күцәлһнд орн-нутгин долан регион орлцх болв.Тедн дунд Дагестан, Тыва, Бурять, Карачаево-Черкесск Республикүд, Сарпулин, Забайкальск краймуд болн Хальмг Таңһч заагдв. Төсв болһна күцәлһнә туст ямр керг-үүлдврмүд давулгдхинь батлад, дааврта улсиг йилһәд, тер кергт регион болһна сенатормуд бас орлцхмн гиҗ шиидвр һарһгдв. Терүнәс нань хөөнә ноос эд-бод кедг бүрдәцс шишлң сертификат авх зөвтә.

ОЛЬДАН Цаһан