Төрскән харсачнрт килмҗән тусхаҗ

Төрскән харсачин Өдр угтад, «Негдсн Әрәсә» партин седвәрәр цергә даалһвран күцәҗ йовдг нег һазра улсиг дөңнлһнә буйнч седклин керг-үүлдвр эклв. Терүнә йовудт цергә шишлң керг-үүлдврт орлцҗадг болн шав авсна ашт эмнлһнд бәәдг цергчнрт дулан хувц-хунр, эм, хот-хол цуглулхмн.

Партин региональн әңг цергчнриг дөңнҗ эн керг-үүлдврт орлцсн улсин төлә шишлң талвңгуд бүрдәв. Дулан хувц-хунр, хот-хол, шикр-балта авч ирсн деерән бичгүд, зургуд бас белдҗ болхмн. Шидр Элстд эн керг-үүлдвр эклв. «Молодая Гвардия» олна бүрдәцин шунмһа орлцач Саңһҗин Бата нүр үг келҗ, цергә керг-үүлдврт орлцҗадг нег һазра улст дөң күрглһн ик чинр зүүҗәхиг темдглв, дәәчнрт чидл урһаҗ омг өгнә гив.
Эн керг-үүлдврт түрүн зергләнд орлцсн улс дунд найн һурвта Нарна Юлия билә. Юлия Коталаевна эврән арвн һар дулан өөмс өлгҗ, цергчнрт белглв. «Мана цергчнрт бат эрүл-менд дурдҗанав. Цуһар әмд-менд хәрҗ иртхә. Эн өөмсн мана көвүдиг дулалсн деерән гертнь эдниг күләҗәхиг медүлҗ, ик чидл өгтхә», - гиҗ медәт цаһан седкләсн дурдв.
«Негдсн Әрәсә» партин Хальмг Таңһчд үүлддг әңг эн керг-үүлдвриг «Ах үйин улс» гидг орн-нутгин төсвин йовудт бүрдәв. Цергә керг-үүлдврт орлцҗадг нег һазра улсиг дөңнх саната нег һазра улс болм тәвцән орулҗ чадҗана.
БАТАН Наталья