Цергчнрт – шин көлгн

Урҗ өдр Хальмг Таңһчин әмтнә социальн теткврин төвин (КЦСОН) улд темдгтә керг-үүлдвр болв. Мөч тату улс, хамгин түрүнд цергә шишлң керг-үүлдврт орлцачнр җолачин эрдм дасхин төлә шишлң көлгн хулдҗ авгдв. Урднь мана таңһчд тиим көлгн уга бәәсмн, тегәд гемтә-шалтгта улст җолачин эрдм дасхин төлә талдан балһсдт йовх кергтә бәәсмн.
Хальмг Таңһчин социальн делгрлтин, күч-көлснә болн көдлмшәр тетклһнә министерствин эрмдгтә улсин болн ветеранмудын керг-төрин әңгин һардач Эрнҗәнә Санлын келсәр, эн көлгн ирлцңгү көтлврин йовудт хулдҗ авгдсн болв. «Шавтад, эрмдгтә болсн цергә керг-үүлдврт орлцсн улс җолачин эрдм дасад, җирһлин таалан ясрулхин төлә шишлң көлгн хулдҗ авгдв. Бидн ахр цагин болзгт һарарн залдг шишлң кергсл углҗ тәвлһнә төр хаһлвидн. Таңһчин сурһуль-эрдмин болн номин министерствлә нөкцҗ үүлдәд, эн төр хамдан хаһлснь темдгтә», – гиҗ эн цәәлһв.
КЦСОН-а һардач Светлана Роман шишлң көлгнә түлкүриг И.Эльвартыновин нертә политехникин колледжин һардач Галина Васькинад бәрүлҗ өгв. Галина Васильевнан келсәр, эднә сурһульд цергә шишлң керг-үүлдврт орлцачнрин 40 күүкн-көвүн сурчана, багшнр болн оютнр нег һазра цергчнриг дөңнҗ, буйнч седклин кергт шунмһаһар орлцна. Ода болхла эдн ветеранмудт маши залдг эрдм дасхад тусан күргхнь ик дааврта керг мөн. Эн сурһулин бүрдәцд җолачин эрдм дасхин төлә шишлң таал бәәнә. Колледжд җолачин эрдм дасхдг багш Андрей Городничийин келсәр, эн гемтә-шалтгта улсиг сурһхин төлә мергҗлтән өөдлүлв. Моһа сарин эклцәр эдн түрүн цергчнриг сурһдг болхмн.
«Төрскән харсачнр» шаңһа саңгин таңһчд үүлддг әңгин һардач Хаалһин Очр, Хальмг Таңһчин сурһуль-эрдмин болн номин министерствин әңгин һардач Увшин Зоя болн «Баатрмуд 08» көтлврт орлцач, СВО-н ветеран Дольган Трофимов, мөч тату улсин «Шин җирһл» олна бүрдәцин ахлач Команҗан Александр керг-үүлдврт орлцад, шишлң көлгн хулдҗ авгдснь мана таңһчин төлә ончта йовдл болҗахиг темдглв. Давсн зунар шишлң көлг авсн цергә керг-үүлдврт орлцач Александр Столяренко җолачин иткл цаас авхин төлә Волжск балһснд одад немр сурһуль сурсн билә гиҗ Хаалһин Очр келв. Ода ветеран эврән машиһән залад, өрк-бүләрн Хар теңгс күртл чигн йовҗ амрна. Иим шишлң көлгн хулдҗ авгдсна хөөн СВО-н ветеранмуд болн эрмдгтә улс җолачин эрдм дасад, олна дунд зөвтә орман эзлҗ чадхмн гиҗ хургт орлцачнр темдглв.
Мөч тату улсин олна бүрдәцин ахлач Команҗан Александр көлг һарарн залдг кергсл олзлад, шин машиһәр йовҗ үзв. Энүнә келсәр, шишлң көлгн тааста болхмн. СВО-н ветеран Дольган Трофимов цуг дәәчнрин нерн деерәс эднә төрмүд хаһллһнд ик оньг тусхадг төләднь таңһчин һардврт болн социальн делгрлтин министерствин көдләчнрт ханлтан өргв.
ДООҖАН Наталья