Таңһчин делгрлтин төлә үүлдх күслтә

Шидр Элстд Хальмг Таңһчин Олна палатын шин хань түрүн сүүрән давулв. Энүг Хальмг Таңһчин Толһач Хаска Бату нүр үгәр секч, олна бүрдәцин шин гешүдиг йөрәҗ күцәмҗ дурдв.
- Тадн олн улсин сә хәәҗ, экономикин кесг салврин төрмүд хаһллһнд дөң болнат, дааврта хәләцән медүлнәт. Седвәртә, төрскнч седклтә, дааврта улсин нилчәр олна бүрдәцин үүлдвр күцәмҗтә болна. Болв улм өөдән күцәмҗ бәрхин төлә үүлдх кергтә. Хоршасн дамшлт таднд туслхнь лавта. Урдк кевәрн бачм кесг төр хаһллһнд нөкд болҗ бүрдәмҗтә, йовудта көдлмшән цаарандан давултн. Хальмг Таңһчин болн Әрәсән делгрлтин төлә шунҗ үүлдх кергтә. Хальмг Таңһчин Олна палат Әрәсән регионмудын палатмуд дунд болдг марһанд 6-ч орм эзлв. Ода шин улс Олна палатд ирв, эн шинрлт мадниг бас байрлулҗана. Баһ наста шин гешүд шунлттаһар көдлҗ, шин төсв күцәҗ, таңһчин улсин бәәдл-җирһл ясруллһнд нилчән күргәд бәәх гиҗ иткҗәнәв. Тана керг бүтхлә, олн дунд нернтн һарад бәәх. Зөрсн күн күслдән күрнә гидгәр, таднд үлгүр-үзмҗтә көдлмш дурдҗанав, - гиҗ таңһчин Толһач товчлв.
Дарунь Олна палатын хамгин медәтә гешүн Болтыра Александр 2026-2029 җилмүдт үүлдх шин ханьд орсн улсин тускар соңсхвр кев. Таңһчин Толһач, таңһчин Улсин Хурал (Парламент) болн Олна палатд олна бүрдәцд орх улсин кандидатнриг заана, дәкәд долан күүг гешүд эврән йилһҗ авна. Сүүрин эклцәр Олна палатын ахлачин суңһвр болв, гешүд нег дууһар эн үүлд Мучан Баатриг суңһв.
Баатр Иванович Олна палатын һардачд энүг суңһснд үүрмүдтән ханлтан өргҗ, Әрәсән регионмуд дунд 6-ч орм эзлсн йовдл бүклдән Хальмг Таңһчин ик күцәмҗ болҗахиг темдгләд, иргчдән талдан чигн кесг төр күцәҗ үүлдхвидн гив. Цааранднь Олна палатын ахлач эврә даруксин тускар келв. Терүнә хөөн Елена Крылова болн Раим Файзиев нег дууһар ахлачин даруксин үүлд суңһгдв. Эдн олна көдлмшт шунлттаһар орлцна, эдниг таңһчд сәәнәр меднә, зөв-йосна халхин кесг төр хаһллһнд эдн селвгән өгч, эгл улст дөң болна гиҗ эднә тускар Баатр Иванович цәәлһв. Дарунь палатын зурһан комиссин ахлачнр бас суңһгдв.
- Намаг палатын ахлачин дарукд суңһснд ханлтан өргҗәнәв. Мана бәәдл-җирһлиг ясрулдг кесг шин төсв тохраһад бәәхвидн, талдан бүрдәцст теднә зурас күцәлһнд дөң болх зөвтәвидн. Эн җил Әрәсән Орн-нутгин Хүүвин депутатнрин суңһвр болхмн, тер ик чинртә керг-үүлдврт мана палатын гешүд олна бүрткәчнр болад орлцад бәәх, – гиҗ Елена Крылова тоолврарн хувалцв.
Тер мет эрүл-менд харлһна комиссин ахлачд суңһгдсн Болтыра Александр селвгән орулв. «Әрәсән келн-улсин ниицлтин җил болҗана. Тегәд мана таңһчд ЮФО-н болн Ар Кавказин дуһргудын элчнрлә «төгрг ширән» сүүр кехлә, олзта-туста болх гиҗ санҗанав. Тиим үүлдвр кесг келн-улсиг негдүлҗ, талдан ик кемҗәтә төсвс күцәлһнд туслхмн», - гиҗ Александр Пюрвеевич келв.
Олнд темдгтә гешүдин тоод Наталья Зинченко заагдв. Таңһчин арһлачнрт болн бүрдәцст тоочин туслмҗ күргнә. Энүнә седвәрәр арһлачнр СВО-д церглҗәдг дәәчнрт БПЛА-н дәврлһнәс харсдг өдгә цагин техник илгәв. Эн сүүрт Наталья Николаевна экономикин төрәр бәәдг комиссин ахлачд суңһгдв. Бидн арһлачнрин көдлмшин таал ясруллһнд, өдгә цагин кергсл көдлмштән олзлхд селвг өгч, дамшлтарн хувалцхин төлә нүүрлгч мергҗлтнриг Элстүр дууднавидн. Цааранднь чигн арһлачнрин керг өргҗхин төлә шин төсвс күцәхвидн, гиҗ Наталья Зинченко келв.
Тер мет СВО-н ветеран Мингиян Нахошкин волонтермудын җисәг дөңндг комиссин ахлачд суңһгдв. Баһчудт сурһмҗ өглһнә, тедниг олна үүлдврт орлцуллһна төсвиг күцәхәр зуралҗана. Терүнлә хамдан гешүдин тоод орсн цергә шишлң керг-үүлдврин ветеран Хулхачин Һәрә фермермүдин җисәг батрулҗ, теднд дөң болхар седҗәнә, тер мет селәнә эдл-ахун халхар зуульчллһна туск төсвиг күцәлһнд орлцхар зуралҗана.
Федеральн инспектор Александр Беляев, таңһчин Улсин Хуралын (Парламентин) Ахлач Артем Михайлов, таңһчин Толһачин һардврин ахлач Кирилл Попов Олна палатын гешүдиг йөрәҗ, күцәмҗ дурдв. Тадн олна ик бүрдәц болҗанат, олна ик кергүд күцәлһнд ик дамшлт хоршасн бәәнәт. Таңһчин әмтнә хамцлтыг батруллһнд тадна үүлдвр ик нилчән күргҗ чадхмн. Мана таңһчин болн Әрәсән делгрлтд тәвцән орулҗ, күцәмҗтәһәр үүлдтн гиҗ эдн йөрәлдән темдглв.
- Мана таңһч цааранднь делгрәд йовна, Әрәсән Президентин дөңгәр ик кемҗәтә кесг төсв Хальмг Таңһчд күцәгдҗәнә, терүнә ашт экономикин кесг салврт күцәмҗ бәрҗәнәвидн, өдгә цагин эв-арһсиг өргҗүлх зөвтәвидн. Цуг тер кергт тадн бас орлцҗ, арһ-чидлән хамцулад бидн зурасан бүтәх зөвтәвидн, - гиҗ таңһчин Толһач Олна палатын гешүдиг урмдулв.
Сүүрин чилгчәр Хаска Бату Олна Палатын ахлач Мучан Баатрт Хальмг Таңһчин Күндллһнә һашг бәрүлҗ өгв.
ТҮРВӘН Һуна