Эцк герин эзн болдг

Ик кезәнәс авн хальмг улсин төлә өрк-бүл, уңг-тохм ик чинр зүүнә. Күүкд күн герин чимг болхла, эцк герин эзн болад, өрк-бүлән теҗәдг бәәсмн. Хальмг өрк-бүлд залу күн көвүдт чик сурһмҗ өгч, мал асрдгиг, төрскн һазран харсдгиг дасхдг авъяста. Өдгә цагт төрскнч седклтә, чик авг-бәрцтә, бичкдүдт сән сурһмҗ өглһнә халхар эцкин чинр улм өсәд бәәхнь лавта. Сүл цагт мана орн-нутгт эцкин Өдр темдглдг болснь, эцкнрин олна бүрдәцсин үүлдвр шунмһадулгдҗахнь басл орта йовдл болҗана.
2024 җилд мана орн-нутгт өрк-бүлин җил зарлгдсн билә. Дигтә тиигхд Элстд бәәдг Цереновихн «Җилин сән гисн өрк-бүл» гидг Әрәсән марһанд диилвр бәрсн билә. Тер марһана хөөн эднә өрк-бүл кесг керг-үүлдврт орлцҗ, соньн төсвсин седвәр татсн мөн. Тиигәд, нидн эдн Тульск мүҗд одад, Әрәсән өрк-бүлмүдин ниицәнә ик хургт орлцв. Билгтә, седвәртә, олна бәәдл-җирһлд шунмһаһар орлцдг өрк-бүлмүдлә харһад таньлдад, Олег Владимирович Әрәсән эцкнрин җисәнә үүлдврәр соньмсв.
- Әрәсән эцкнрин ниицәнә ахлач Александр Зарембан олна үүлдврәр соньмсад, мана таңһчд терүнә әңг секх седвәр татсн биләв. Эн олна ниицән 2017 җиләс авн үүлдҗәнә, терүнә ханьд орн-нутгин регионмудын әңгүдиг толһалдг залу улс цуһар гилтә олн үртә, олна кергт шунмһаһар орлцдг, арһта, төрскнч седклтә улс мөн. Одахн би олна ниицәнә хургт орлцад ирүв. Хург Москва балһснд Әрәсән Олна палатын улд болв, терүнд 76 региона элчнр цуглрв. Олна бүрдәцин гешүд күцәҗәдг көдлмшиннь тускар келәд, дамшлтарн хувалцв. Эн керг-үүлдвр нанд соньн болҗ медгдв. Күцәмҗтәһәр үүлдҗәдг ниицәсин дамшлтыг олзлад мана таңһчд көдлмшән бүрдәх санан бәәнә, - гиҗ Олег Владимирович келнә.
Эцкнрин ик хургт Әрәсән Орн-нутгин Хүүвин депутат, сойлын комитетин ахлачин дарук Денис Майданов орлцад, өрк-бүлин чинр өөдлүллһнд, дорас өсч йовдг бичкдүдт төрскнч сурһмҗ өглһнд эцк онц орман эзлҗәхиг темдглв. Ик хург туула сарин 30-ас авн лу сарин 1 күртл болв, терүнә йовудт Александр Невскийин шүтә әрүсллһнә керг-үүлдвр болв.
Өдгә цагт мана орн-нутгт улсин ниицлтин җилд нерәдгдсн керг-үүлдврмүд болҗана. Хургт орлцачнр келн-улсин хоорндк залһлда батруллһна, хамцу керг-үүлдврмүд давуллһна тускар бас күүндв. Эцкин зөв харслһна туст ирлцңгү закана төсвс белдхин тускар бас өргн күүндвр болв. Цернә Олегин келсәр, нидн эднә әңг җирһлин күнд таалд туссн насни дигт күрәд уга бичкдүдин болн цергә керг-үүлдврт орлцачнрин күүкд-көвүдин төлә буйнч седклтә керг-үүлдврмүд бүрдәсн болв.
Эцкин хургин йовудт Олег Владимирович Кабардино-Балкарин, Чувашин, Татарстана, Нижний Новгород балһсна болн нань талдан һазрин элчнрлә иньгллтин залһлда батрулв. Эн җил Ульяновск мүҗин эцкнрин олна ниицәнлә хамдан сурһульчнрин төлә бас шишлң керг-үүлдвр бүрдәх санан бәәнә. Дәкәд Элстд Христос бууҗ ирснә 80 җилин әрүн йовдлд нерәдҗ бас соньн төсв күцәхәр зуралҗана. Энүнә үгәр, ода олна ниицәнә шунмһа орлцач болҗ зуг һурвн-дөрвн залу үүлдҗәнә. Арһлачнр Евгений Утанов, Манҗин Зурһан болн «Движение первых» баһчудын җисәнә һардачин дарук Дорҗин Төлә болн Олегин ахнь Цернә Евгений ямр нег керг-үүлдвр бүрдәхд дөң болна.

ДООҖАН Наталья
ЗУРГТ: Цернә Олег Әрәсән
эцкнрин ик хургт орлцсн кем