Үвлзлһнә халхар бүртклһ давулад

Малчнрин төлә үвлзлһнә дааврта кем цаарандан давҗана. Хальмгин селәнә эдл-ахун министерствин мергҗлтнр таңһчин эдл-ахусар йовад, көдлмшиг даңгин бүрткнә. Одахн министерствин элчнр Приютна района «Агрофирма Пик Плюс» эдл-ахуд одад, тенд үвлин кем яһҗ давҗахинь шинҗлв.
«Агрофирма Пик Плюс» эдл-ахун ах зоотехникч Манҗин Җаңһрин келсәр, энд 2,5 миңһн һар хөн болн 1,5 миңһн һар толһа бод мал үвлзҗәнә. Малын хотан күцц кевәр белдәд, хаша-хаацан эртәснь ясад, ветеринарн керг-үүлдврмүдиг бас цаг-болзгтнь күцәввидн. Үвлин дааврта кемин өрәлнь давҗ одв, малын чинән му биш, удл уга моһа сард үкрмүд экләд туһлхмн. Нидн мал өсклһнә халхар шаңһа дем аввидн. Тегәд энүгән олзлад, малын то цааранднь икдүлхәр зуралҗанавидн гив.
– Таңһчин Толһач Хаска Батун даалһсар үвлзлһнә кемиг даңгин бүрткнәвидн. Малчнрла харһад, теднә керг-төрмүдт орлцнавидн. Үвлзлһән сәәнәр давулад, хавртан малын сән төл авад, орн-нутгин, нег үлү таңһчин хот-хоолын әәмшг уга бәәдл тогталһнд нег һазра фермермүд темдгтә тәвцән орулхнь лавта, – гиҗ Хальмг Таңһчин селәнә эдл-ахун министр Гаван Тимур темдглсн болдг.

КАРСАНА Евгения